“Dy të vdekur dhe 50 të plagosur”, tragjedi në Milano: Tramvaji del nga shinat, përplaset me një pallat

Një aksident i rëndë ka ndodhur pasditen e së premtes në Milano, ku një tramvaj ka dalë nga shinat dhe është përplasur me një pallat në drejtim të Porta Venezia. Si pasojë e aksidentit, dy persona kanë humbur jetën dhe 50 të tjerë janë plagosur, mes tyre dy në gjendje të rëndë.

Dy viktimat, të dy meshkuj dhe pasagjerë në tramvaj, janë hedhur jashtë mjetit për shkak të përplasjes së fortë. Një prej viktimave është një italian 60-vjeçar nga Milano, ndërsa viktima e dytë është një shtetas senegalez, i cili ndërroi jetë pak pas mbërritjes në spital.

Shkaqet e aksidentit janë ende nën hetim. Drejtuesi i tramvajit ka deklaruar se ka pësuar një problem të papritur shëndetësor. “U ndjeva keq, pata një shqetësim”, mësohet të ketë thënë ai para kolegëve që mbërritën në vendngjarje. Shoferi, i cili punon prej 34 vitesh për kompaninë e transportit publik u dërgua në spital për kontrolle mjekësore.

Prokuroria e Milanos ka hapur një hetim për vrasje nga pakujdesia, nën drejtimin e prokurores Elisa Calanduçi. Versioni i shoferit po verifikohet, ndërsa autoritetet kanë sekuestruar edhe telefonin e tij celular, i konsideruar si element kyç për zbardhjen e dinamikës së ngjarjes.

Tramvaji i linjës 9, që lidh Porta Genova me Stacionin Qendror, kishte hyrë në shërbim vetëm pak javë më parë. Sipas informacioneve paraprake, mjeti po lëvizte me shpejtësi të lartë kur doli nga shinat dhe u përplas me ndërtesën. Tramvaji ishte i mbushur me pasagjerë, të cilët nga përplasja e fortë u rrëzuan në tokë, duke shkaktuar numrin e lartë të të plagosurve.

Foto: Zjarrfikësit Milano

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)