Irani kërcënon shtetin e BE: Do lëshojmë raketa në Qipro deri në largimin e amerikanëve

Kërcënimet ndaj Qipros janë intensifikuar ndjeshëm, ndërsa tensionet në Mesdheun Lindor po marrin përmasa të reja ushtarake. Deklaratat e fundit nga një prej drejtuesve të lartë të Gardës Revolucionare iraniane kanë ngritur alarmin në Nikosia dhe Athinë, duke shtyrë Greqinë të reagojë me masa të menjëhershme mbrojtëse.

Gjenerali i Gardës Revolucionare, Ebrahim Jabari, paralajmëroi se objektiv i radhës mund të jetë Qiproja. “Amerikanët kanë transferuar shumicën e avionëve të tyre në Qipro. Ne do të lëshojmë aq shumë raketa drejt Qipros, saqë amerikanët do të detyrohen të largohen edhe nga atje”, deklaroi ai. Sipas tij, deri më tani janë lëshuar rreth 3 mijë raketa të gjeneratës së parë dhe të dytë, ndërsa paralajmëroi përdorimin e raketave të gjeneratës së tretë dhe të katërt në ditët në vijim. Ai shtoi gjithashtu se janë ngritur në ajër rreth 10 mijë dronë.

Pas sulmeve iraniane në bazën britanike në Akrotiri, autoritetet greke reaguan menjëherë. Ministri i Mbrojtjes Kombëtare i Greqisë, Nikos Dendias, njoftoi se, pas një bisede mes kryeministrit Kyriakos Mitsotakis dhe presidentit të Qipros Nikos Christodoulides, është vendosur dërgimi i dy fregatave dhe një pale avionësh luftarakë F-16 në Republikën e Qipros.

“Pas sulmeve të paprovokuara, e sigurova homologun tim se Greqia do të kontribuojë në mbrojtjen e Qipros gjatë gjithë krizës. Fregata ‘Kimon’ po dërgohet menjëherë, si dhe një fregatë e dytë që mban sistemin ‘Kentaurus’. Gjithashtu, një palë avionë F-16 po dërgohen në Republikën e Qipros”, deklaroi Dendias, duke shtuar se do të udhëtojë në Nikosia për koordinim të mëtejshëm.

Edhe përfaqësuesi i qeverisë qipriote, Konstantinos Letymbiotis, falënderoi publikisht Greqinë për mbështetjen, duke theksuar forcimin e bashkëpunimit mes dy vendeve përballë zhvillimeve të rrezikshme në rajon.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)