Rritja e naftës, ministri danez apel qytetarëve: Mos përdorni makinat nëse nuk është e nevojshme

Ministri danez i Energjisë, Lars Aagaard iu ka bërë thirrje qytetarëve që të shmangin përdorimin e automjeteve nëse nuk është e nevojshme, për të kufizuar konsumin e energjisë gjatë një periudhe kritike globale në lidhje me furnizimet me naftë.

"Nëse mundeni, bëni çmos të hiqni dorë nga automjeti juaj me katër rrota", tha Aagaard. Ai shtoi se "nëse ka konsum energjie pa të cilin mund të bëni, nëse ngarja e një makine nuk është absolutisht e nevojshme, atëherë mos e bëni".

"Nëse ne danezët arrijmë të kursejmë energji në të ardhmen e afërt, kjo do të ketë dy efekte pozitive", vuri në dukje ministri: "Së pari, do të ndihet në portofolet private. Dhe së dyti, mund të ndihmojë që rezervat tona të zgjasin më shumë".

Deklarata e ministrit vjen në një kohë kur e gjithë bota është duke u përballur me një pasiguri të madhe në lidhje me furnizimin me naftë, për shkak të krizës në Lindjen e Mesme.

Vendet e G7 vendosën disa ditë më parë që të nxjerrin në treg një pjesë të rezervës së tyre strategjike për të stabilizuar çmimet, ndërkohë që bursat po përballen me presione të mëdha.

Situata është rënduar edhe më shumë me autoritetet në Iran që kanë kërcënuar se nuk do të lejojnë asnjë anije me naftë që të kalojë në Ngushticën e Hormuzit.

Për këtë çështjet reagoi dhe presidenti Trump i cili deklaroi se për shkak të luftës çmimet do të rriten për pak kohë, por ajo që do të vijë më pas do të jetë shumë e mirë për qytetarët.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)