Në qendër të mistereve të mafies siciliane, ndahet nga jeta ish-agjenti 007

Në filmat me James Bond, agjenti 007 shpëtonte botën nga rreziku i krimeve që mund të shkaktonin shkatërrim total. Në Itali, agjentët 007 kishin si mision luftën kundër mafies. Një prej tyre ishte Bruno Contrada, i cili ka ndërruar jetë në moshën 94-vjeçare. Ai ishte ish-drejtues i Policisë Kriminale në Palermo dhe ish-numri tre i Shërbimit për Informacion dhe Siguri Demokratike, shërbimi sekret civil që funksionoi në Itali nga viti 1977 deri në vitin 2007.

Contrada ishte një figurë e rëndësishme gjatë viteve më të dhunshme të luftës kundër mafias në Sicili, por edhe një personazh i diskutueshëm për shkak të proceseve të gjata gjyqësore ndaj tij. Gjatë karrierës së tij, ai drejtoi Skuadrën e Gatshme të Palermos dhe më pas seksionin sicilian të Kriminalistikës. Në vitet ’80 iu bashkua Shërbimit për Informacion dhe Siguri Demokratike, ku arriti të bëhej numri tre i këtij institucioni.

Megjithatë, emri i tij mbeti i lidhur me një çështje gjyqësore shumëvjeçare që ndau qëndrimet e opinionit publik, mes atyre që e cilësonin të pafajshëm dhe atyre që e shihnin si fajtor. Contrada u arrestua në prag të Krishtlindjeve të vitit 1992, në vitin e atentateve mafioze në Palermo dhe u gjykua për bashkëpunim të jashtëm me organizatën mafioze. Në vitin 1996 ai u dënua me 10 vite burg, një vendim që u rrëzua nga Gjykata e Apelit në vitin 2001.

Pas disa proceseve të tjera, në vitin 2006 ai u dënua sërish me 10 vite burg dhe dënimi u konfirmua nga Gjykata e Kasacionit një vit më vonë. Ai vuajti një pjesë të dënimit në burg dhe më pas në arrest shtëpie, deri në përfundimin e dënimit në tetor të vitit 2012. Pas përfundimit të dënimit, Contrada kërkoi rishikimin e procesit dhe iu drejtua Gjykatës Europiane për të Drejtat e Njeriut. Strasburgu e dënoi dy herë Italinë, duke vlerësuar se dënimi i tij për bashkëpunim të jashtëm me mafian nuk ishte i justifikuar.

Sipas argumentit nga Gjykata, në kohën kur dyshohej se kishte ndodhur krimi në periudhën ndërmjet viteve 1979 dhe 1988, ky veprim nuk ishte i përcaktuar qartë si vepër penale. Në vitin 2023, Gjykata e Kasacionit konfirmoi gjithashtu një vendim për kompensim ndaj tij për paraburgim të padrejtë. Gjatë gjithë këtyre viteve, Contrada kishte deklaruar se luftonte për të mbrojtur nderin e tij si njeri i institucioneve.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)