Aksident tragjik, dy të vdekur dhe disa të plagosur në Itali

Një aksident i rëndë rrugor ka ndodhur në veri të Italisë, ku përplasja e katër automjeteve ka shkaktuar dy viktima dhe disa të plagosur.

Ngjarja ndodhi në zonën e Caravaggio, në provincën e Bergamos, përgjatë rrugës provinciale Rivoltana. Sipas mediave italiane, viktimat janë një burrë 38 vjeç dhe një grua 73 vjeçe, të cilët ishin përkatësisht babai dhe gjyshja e dy fëmijëve që mbetën të plagosur në aksident.

Sipas rindërtimit paraprak të ngjarjes, një automjet që po udhëtonte nga Caravaggio në drejtim të Mozzanica dyshohet se ka tentuar të kryejë një parakalim të rrezikshëm. Gjatë kësaj manovre, makina është përplasur me dy automjete të tjera, duke shkaktuar një përplasje zinxhir që përfshiu gjithsej katër mjete.

Një prej makinave të përfshira në aksident transportonte një familje, një çift me dy fëmijët e vegjël dhe gjyshen e tyre. Pas përplasjes së fortë, automjeti doli nga rruga dhe përfundoi në kanal, duke shkaktuar vdekjen e 38-vjeçarit dhe 73-vjeçares.

Fëmijët dhe disa persona të tjerë mbetën të plagosur dhe u dërguan menjëherë në spital për trajtim mjekësor.

Në vendin e ngjarjes ndërhynë menjëherë ekipet e emergjencës, përfshirë shërbimet e 118-s me disa ambulanca dhe dy helikopterë, si dhe forcat e policisë dhe zjarrfikësit, të cilët punuan për nxjerrjen e të plagosurve nga automjetet e dëmtuara dhe për sigurimin e zonës.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)