“Një minë me sahat në Mesdhe”, cisterna ruse pa ekuipazh që mund të shpërthejë në çdo moment

Një anije cisternë ruse e sanksionuar, e ngarkuar me gaz natyror të lëngshëm, po lundron jashtë kontrollit në Detin Mesdhe, duke ngritur alarmin për një katastrofë të mundshme ekologjike.

Anija “Arctic Metagaz”, pjesë e të ashtuquajturës flotë “hije” që transporton naftë dhe gaz rus, është dëmtuar rëndë pas një sulmi të dyshuar me dron detar pranë ujërave të Maltës në fillim të këtij muaji. Aktualisht ajo ndodhet pa ekuipazh dhe me një vrimë të madhe në njërën anë.

Autoritetet italiane dhe malteze po monitorojnë lëvizjen e saj, ndërsa anija po largohet nga ujërat italiane dhe ishulli Lampedusa drejt brigjeve të Libisë. Sipas zyrtarëve italianë, rreziku është shumë i madh dhe ekziston mundësia që ajo të shpërthejë në çdo moment.

Cisterna mendohet se transporton sasi të konsiderueshme gazi, si dhe rreth 450 tonë karburant dhe 250 tonë naftë. Në një distancë relativisht të afërt me ujërat territoriale, ajo përbën kërcënim serioz për mjedisin detar.

Ngjarja ka shtyrë nëntë vende të Bashkimit Evropian t’i kërkojnë Komisionit Evropian ndërhyrje urgjente. Ndërkohë, Rusia ka akuzuar Ukrainën për sulmin, por Kievi nuk ka reaguar ndaj këtyre pretendimeve.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)