Austria, vendi i radhës që ndalon rrjetet sociale për fëmijët

Qeveria e Austrisë ka njoftuar planet për të ndaluar përdorimin e rrjeteve sociale për fëmijët nën 14 vjeç, duke u bërë një nga vendet e fundit që konsideron kufizime për të miturit në internet.

Vendimi pason negociata të gjata brenda koalicionit trepartiak me udhëheqje konservatore, por ende nuk është e qartë se si dhe kur do të zbatohet ndalimi.

Zëvendëskancelari Andreas Babler nga Partia Socialdemokrate tha se qeveria nuk mund të qëndrojë duarkryq ndërsa rrjetet sociale bëjnë fëmijët “të varur dhe shpesh të sëmurë”. Ai shtoi se është përgjegjësi e politikës të mbrojë fëmijët dhe se rregullat duhet të jenë të qarta, po aq sa për alkoolin dhe duhanin.

“Fëmijët nën 14 vjeç do të mbrohen nga algoritmet që krijojnë varësi,” tha Babler.

Ministri i Arsimit Christoph Ëiederkehr vuri në dukje natyrën “e dëmshme” të rrjeteve sociale dhe nevojën që përdoruesit e rinj të mësojnë të përdorin teknologjinë me përgjegjësi.

Shteti sekretar për dixhitalizimin, Alexander Pröll, njoftoi se një draftligj për ndalimin pritet të prezantohet deri në fund të qershorit, duke përfshirë detaje teknike për verifikimin e moshës së përdoruesve.

Austria i bashkohet kështu vendeve si Australia, Franca, Britania, Danimarka, Greqia, Spanja dhe Irlanda, që gjithashtu po shqyrtojnë kufizime për përdorimin e rrjeteve sociale nga të miturit.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)