“Regjimi në Iran ka pak gjasa të ndryshojë”, Merz skeptik: E provuam këtë gjë dhe në Afganistan

Kancelari gjerman Friedrich Merz ka shprehur skepticizëm të fortë ndaj efektivitetit të luftës së udhëhequr nga Shtetet e Bashkuara të Amerikës dhe Izraeli kundër Iranit, duke paralajmëruar se përpjekjet për ndryshim regjimi mund të dështojnë.

Gjatë një forumi në Frankfurt, Merz vuri në pikëpyetje objektivat e konfliktit, duke theksuar se ndërhyrje të ngjashme në të kaluarën kanë rezultuar të pasuksesshme. Ai përmendi si shembull luftën në Afganistan, duke theksuar se përpjekjet për të imponuar ndryshime politike nga jashtë shpesh kanë sjellë pasoja negative.

“Jam i pasigurt nëse ajo që po bëjnë aktualisht SHBA dhe Izraeli do të ketë sukses”, deklaroi ai, duke shtuar se ka dyshime serioze mbi ekzistencën dhe zbatimin e një strategjie të qartë. Sipas tij, konflikti rrezikon të zgjasë dhe situata mund të përkeqësohet më tej.

Merz paralajmëroi gjithashtu se SHBA dhe Izraeli po përfshihen gjithnjë e më thellë në këtë konflikt, çka mund të rrisë rreziqet për destabilizim më të gjerë në rajon.

Duke komentuar rolin e aleancës perëndimore, ai tha se presidenti amerikan Donald Trump e ka kuptuar se kjo luftë nuk është e NATO-s. Megjithatë, Gjermania ka ofruar mbështetje të kufizuar, si mundësia e mbrojtjes së Ngushticës së Hormuzit në rast armëpushimi.

Ai theksoi se çdo angazhim i tillë kërkon mandat ndërkombëtar dhe miratim nga parlamenti gjerman, duke shtuar se aktualisht kjo nuk është një opsion.

Ndërkohë, përplasjet kanë vijuar të përshkallëzohen që nga fundi i shkurtit, me Iranin që ka reaguar me sulme të përsëritura me dronë dhe raketa ndaj objektivave izraelite dhe bazave amerikane në rajon.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)