Shqiptari me xhup të çuditshëm ngre në këmbë policinë britanike, e kujtuan për kamikaz

Një shqiptar u gjunjëzua nga snajperistët e policisë në Manchester, pasi veshjen me pesha të palestrës që mbante e ngatërruan me një jelek shpërthyes. Ngjarja ndodhi më 20 mars në “Mandley Park”, pranë një palestre të hapur, ku burri, rreth të 40-ave, po ushtrohej me një xhup me pesha dhe një litar për kërcim.

Policia kishte marrë raportime për një “burrë të dyshimtë” dhe nxitoi në vendngjarje, duke menduar se mund të ishte një sulmues vetëvrasës. Snajperistët qëndruan të pozicionuar dhe një helikopter shkoi menjëherë në zonë së bashku me disa makina policie.

Shqiptari, i cili jeton në Mbretërinë e Bashkuar prej 25 vitesh, tregoi se u frikësua kur dëgjoi oficerët duke urdhëruar “shtrihu”. Ai rrëfen se kishte ndjekur këshillat e mjekut për t’u ushtruar për shkak të diabetit tip 2 dhe problemeve me zemrën.

Pas disa orësh në stacionin e policisë, burri u lirua dhe nuk do të merren masa të tjera ndaj tij. Autoritetet theksuan se gjithçka ishte një “alarm i rremë” dhe se komuniteti nuk ishte në rrezik.

Një zëdhënës i Këshillit Përfaqësues të Komunitetit Hebre të Manchesterit falënderoi policinë për përgjigjen e shpejtë dhe profesionale, duke vënë në dukje se incidenti reflekton shqetësimet dhe tensionet që përjetojnë komunitetet hebreje në mbarë botën.

Shqiptari tha se ai viziton shpesh zonën për ushqime dhe aktivitete me fëmijët e tij, duke shtuar se gjithçka u zgjidh në mënyrë paqësore.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)