Afera CEZ-DIA, avokatët e Metës: Do publikojmë videon e një politikani që merr para

Në një moment kur çështja CEZ-DIA rikthehet sërish në qendër të debatit publik, mbrojtja e ish-presidentit Ilir Meta ka dalë me akuza të forta ndaj institucioneve të drejtësisë, duke e cilësuar procesin si të motivuar politikisht.

Në një konferencë për shtyp, avokatët Kujtim Cakrani dhe Gylsen Zhllima deklaruan se akuzat ndaj Metës janë të montuara dhe pa asnjë bazë ligjore. Sipas tyre, bëhet fjalë për një plan afatgjatë për eliminimin politik të tij, që sipas mbrojtjes daton që nga viti 2011. Ata theksuan se kallëzimi penal nuk mbështetet në prova, dëshmi apo fakte konkrete, por është ndërtuar mbi prapavijë politike.

Avokati Gylsen Zhllima deklaroi se në ditët në vijim do të publikohet një video, ku sipas tij shfaqet një politikan duke marrë para në dorë, i lidhur me marrëveshjen CEZ-DIA. “Do ju nxjerrim një material ku duket qartë politikani që merr para nga kjo marrëveshje, që nuk ka lidhje fare me zotin Ilir Meta,” u shpreh ai, duke shtuar se ky fakt, sipas mbrojtjes, rrëzon pretendimet për përfshirjen e Metës.

Nga ana tjetër, mbrojtja ka ngritur edhe shqetësime për paanshmërinë e procesit gjyqësor. Avokatët kundërshtuan praninë e gjyqtares Irena Gjoka në seancën paraprake të dosjes “Meta”, duke argumentuar se ajo ka gjykuar më herët çështje që lidhen me biznesmenin Kastriot Ismailaj, i përfshirë në këtë aferë.

Sipas tyre, fakti që Gjoka nuk ka kërkuar përjashtimin nga çështja ngre pikëpyetje serioze mbi paanshmërinë e procesit. Ata pretendojnë se në disa raste që lidhen me figura të opozitës, vendimet kanë qenë në disfavor të tyre.

Ndërkohë, sipas Struktura e Posaçme Kundër Korrupsionit dhe Krimit të Organizuar, Meta dyshohet se kishte si qëllim përfitimin e rreth 10 milionë eurove nga skema CEZ-DIA, duke përdorur Ismailajn si ndërmjetës.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)