Sulmi hakmarrës po vjen, Rusia bën thirrje për evakuimin e ambasadave të huaja në Kiev

Rusia u ka kërkuar ambasadave të huaja të sigurojnë evakuimin në kohë të stafit dhe qytetarëve të tyre nga Kievi nëse ushtria ruse nis një sulm ndaj qytetit në orët në vijim.

Njoftimi është bërë nga Ministria e Jashtme ruse, e cila në deklaratën drejtuar ambasadave të huaja, paralajmëron se do të nisë një "sulm hakmarrës" në kryeqytetin ukrainas nëse Kievi prish paradën e 9 majit në Moskë.

Ambasadave iu është bërë thirrje të "sigurojnë evakuimin në kohë të stafit diplomatik dhe të misioneve të tjera, si dhe të qytetarëve, nga Kievi".

Armëpushimi i kërkuar nga Rusia përpara paradës së 9 majit në Moskë, që përkujton fitoren sovjetike ndaj Gjermanisë naziste gjatë Luftës së Dytë Botërore, duket se po dështon. Armëpushimi i dhënë nga Ukraina filloi në mesnatë të mërkurën, më 6 maj, por Volodymyr Zelensky akuzon Kremlinin se ka sulmuar disa zona të vendit, duke rezultuar në të paktën 20 viktima.

“Vendimi i Rusisë përfaqëson një shpërfillje të qartë të armëpushimit dhe mbrojtjes së jetëve njerëzore”, shpjegon Presidenti ukrainas në X.

Ukraina ka deklaruar se do të veprojë në përputhje me rrethanat, duke marrë parasysh thirrjet e vazhdueshme të Rusisë për armëpushim gjatë paradës së Moskës.

"Është e qartë për çdo person të arsyeshëm se një luftë në shkallë të plotë dhe vrasja e përditshme e njerëzve nuk janë koha e duhur për 'festime' publike. Bazuar në raportet e mbrëmjes nga forcat tona të armatosura dhe inteligjenca, ne do të vendosim për hapat tanë të mëtejshëm”, theksoi Zelenski.

Ndërkohë, Moska ka njoftuar se ka shkatërruar 53 dronë të Kievit mbi territoret e rajoneve të Belgorodit, Bryansk dhe Kursk, por edhe në Moskë, Krime dhe Detin e Zi.

“Ky është një akt terrorizmi nga regjimi i Kievit, tërbimi neonazist i të cilit është intensifikuar në prag të 9 majit”, tha zëdhënësja e Kremlinit, Maria Zakharova sipas agjencisë së lajmeve Tass.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)