Rritet numri i protestuesve të vrarë në Iran, mijëra të arrestuar

Nuk ka të ndalur dhuna e regjimit iranian ndaj protestuesve që prej rreth dy javësh tashmë kanë mbushur sheshet e qyteteve kryesore të vendit me thirrje kundër drejtuesve dhe ajatollahëve.

Sipas raportimeve më të fundit, të cilat janë ende të vështira të konfirmohen më shumë se 640 persona janë vrarë në protesta, teksa të arrestuarit i kalojnë 10 mijë.

Të dhënat vijnë nga Iran Human Rights, një grup për të drejtat e njeriut me seli në Norvegji, i cili shton se bilanci mund të jetë edhe më i rëndë, por informacioni nuk mund të verifikohet për shkak të ndërprerjes së internetit dhe linjave të tjera të komunikimit.

Grupi, gjithashtu bën apel për mbështetje ndërkombëtare për të dokumentuar shkeljet e të drejtave të njeriut, si dhe për të ushtruar presion ndaj regjimit iranian për të ndaluar dhunën ndaj protestuesve paqësor.

Pamje të frikshme u publikuan së fundmi në rrjetet sociale ku familjarë kërkonin trupat e të afërmve të tyre në oborrin e një spitali të mbushur me qese me kufoma.

Protesta në Iran shpërthyen rreth dy javë më parë për situatën e vështirë ekonomike, por ato shumë shpejt u kthye në një manifestim kundër qeverisjes aktuale.

Irani ka akuzuar SHBA dhe Izraelin se fshihen pas organizimit të protestave, teksa presidenti Trump ka paralajmëruar se mund të ndërmarrë një operacion ushtarak nëse nuk ndalen vrasjet e civilëve të pafajshëm.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)