“Topi është në fushën e Amerikës”, zyrtari iranian: Jemi të gatshëm për marrëveshje bërthamore

Irani ka shprehur gatishmërinë për të diskutuar në përpjekje për të arritur një marrëveshje të re bërthamore me Shtetet e Bashkuara, nëse Uashingtoni është i hapur për heqjen e sanksioneve. Në një intervistë për BBC në Teheran, zëvendësministri i Jashtëm iranian, Majid Takht-Ravanchi, deklaroi se “topi është në fushën e Amerikës” dhe se nëse pala amerikane është e sinqertë, mund të arrihet një marrëveshje.

Deklaratat vijnë në një kohë kur Sekretari amerikan i Shtetit, Marco Rubio, ka theksuar se presidenti Donald Trump preferon një marrëveshje, por e konsideron atë të vështirë. Trump ka paralajmëruar edhe me sulme ushtarake nëse nuk arrihet një akord për frenimin e programit bërthamor iranian, ndërsa SHBA ka rritur praninë ushtarake në rajon.

Takht-Ravanchi konfirmoi se pas një raundi bisedimesh indirekte në Oman, një takim i dytë pritet të mbahet në Gjenevë. Ai përmendi si shenjë kompromisi ofertën e Iranit për të holluar uraniumin e pasuruar në nivelin 60%, pranë pragut për përdorim ushtarak, por theksoi se çështja e “zero pasurimit” nuk është më në tryezë për Teheranin.

Irani refuzon gjithashtu të diskutojë programin e raketave balistike, duke e konsideruar atë pjesë të kapaciteteve mbrojtëse. Nga ana tjetër, SHBA ka përfshirë në kërkesat e saj edhe çështje si mbështetja iraniane për grupet e armatosura në rajon.

Takht-Ravanchi paralajmëroi se një konflikt i ri do të ishte “traumatik për të gjithë rajonin”, duke shtuar se Irani do të përgjigjej nëse do ta ndiente veten të kërcënuar në mënyrë ekzistenciale. Megjithatë, ai u shpreh optimist se diplomacia mund të shmangë përshkallëzimin dhe se raundi i ardhshëm i bisedimeve do të zhvillohet me shpresën për një marrëveshje.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)