450 kg uranium në 'lojë', Trump gati të fusë ushtarët amerikanë për ta marrë në Iran

SHBA-të dhe Izraeli po shqyrtojnë mundësinë e dërgimit të forcave speciale në Iran për të siguruar rezervat e tij të uraniumit të pasuruar në fazat e mëvonshme të luftës.

Axios duke cituar katër burime që kanë njohuri mbi diskutimet raportojnë se marrja e 450 kilogramëve uranium të pasuruar 60 për qind nga regjimi Iranian, i cili mund të shndërrohet në armë brenda pak javësh, është një nga mënyrat kryesore për të arritur që të parandalohet prodhimi i një arme bërthamore, i cili është ndër qëllimet e shpallura të luftës të Presidentit të SHBA-ve Donald Trump.

Por çdo operacion për të sekuestruar materialet ka të ngjarë të kërkojë futjen e forcave amerikane ose izraelite në tokën iraniane, të cilat do të duhet të lundrojnë nëpër objekte nëntokësore të fortifikuara rëndë në mes të luftës.

Për momentin, është e paqartë nëse do të jetë një mision amerikan, izraelit apo i përbashkët, dhe ka të ngjarë të ndërmerret vetëm pasi të dy vendet të jenë të bindura se ushtria iraniane nuk mund të përbëjë më një kërcënim serioz për forcat e përfshira.

Në një konferencë për shtyp të Kongresit të martën, Sekretari i Shtetit Marco Rubio u pyet nëse uraniumi i pasuruar i Iranit do të merrej.

"Njerëzit do të duhet të shkojnë ta marrin atë", u përgjigj Rubio, pa specifikuar se kush do të shkonte ta merrte.

Një zyrtar i Ministrisë izraelite të Mbrojtjes tha se Trump dhe ekipi i tij po e shqyrtonin seriozisht dërgimin e forcave speciale në Iran, dhe një zyrtar amerikan zbuloi se administrata kishte diskutuar dy mundësi. Njëra përfshin heqjen e plotë të materialit nga Irani ose sjelljen e ekspertëve bërthamorë për ta holluar atë në vend. Misioni ka të ngjarë të përfshijë, përveç shkencëtarëve, operatorë specialë, ndoshta nga Agjencia Ndërkombëtare e Energjisë Atomike.

Dy burime të njohura me çështjen thanë se operacione të tilla ishin pjesë e opsioneve që iu paraqitën Trump para luftës. NBC News raportoi të premten se Trump diskutoi idenë e vendosjes së një kontingjenti më të vogël të forcave amerikane në Iran për qëllime specifike strategjike, dhe një zyrtar amerikan zbuloi sfidën operacionale të sigurimit të uraniumit të Iranit.

"Pyetja e parë është se ku ndodhet? Pyetja e dytë është se si të shkojmë tek ai dhe si të fitojmë kontroll fizik... Dhe pastaj do të ishte vendimi i presidentit dhe Ministrisë së Luftës, CIA-s. A duam ta transportojmë fizikisht apo ta hollojmë në vend", tha ai, siç raportohet nga Axios.

Ndërkohë, Trump u tha gazetarëve në bordin e ‘Air Force One’ të shtunën se dërgimi i forcave tokësore ishte i mundur, por vetëm për një arsye shumë të fortë. "Nëse do ta bënim ndonjëherë këtë, iranianët do të shkatërroheshin aq shumë sa nuk do të mund të luftonin në tokë", tha ai.

I pyetur konkretisht nëse trupat mund të shkonin për të siguruar material bërthamor, Trump nuk e përjashtoi. "Në një moment, mund ta bëjmë. Nuk e kemi provuar. Nuk do ta bënim tani. Mund ta bëjmë më vonë", tha ai.

Sakaq, Sekretarja e shtypit e Shtëpisë së Bardhë, Karolina Leavitt, i tha Axios se Trump "po i mban të hapura me mençuri të gjitha opsionet në dispozicion dhe nuk po përjashton asgjë".

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)