Kryeministri i Katarit: Llogaritja e gabuar e Iranit ka “shkatërruar gjithçka”

Kryeministri i Katar, Sheik Mohammed bin Abdulrahman Al Thani, ka dënuar ashpër sulmet me raketa dhe dronë të Iran ndaj vendeve të Gjirit, duke i cilësuar ato si një “gabim të rrezikshëm” që rrezikon të destabilizojë rajonin dhe të godasë ekonominë globale.

Në një intervistë për Sky News, kryeministri foli për herë të parë që kur Katari është përballur me sulme të vazhdueshme, duke thënë se vendi po kalon një periudhë shumë të vështirë. Megjithatë, ai vlerësoi profesionalizmin e forcave të mbrojtjes dhe sigurisë së vendit në përballimin e situatës.

Al Thani shprehu zhgënjim të thellë për veprimet e Teheranit, duke thënë se ato janë ndjerë si një tradhti nga një vend fqinj. “Është një ndjenjë e madhe tradhtie. Vetëm një orë pas fillimit të luftës, Katari dhe vende të tjera të Gjirit u sulmuan. Ne e kishim bërë të qartë se nuk do të merrnim pjesë në asnjë luftë kundër fqinjëve tanë”, deklaroi ai.

Për vite me radhë, Katari ka mbajtur kanale diplomatike të hapura me Iranin dhe është pozicionuar si një ndërmjetës në disa nga krizat më të ndërlikuara ndërkombëtare. Por sipas kryeministrit, sulmet e fundit kanë vënë në pikëpyetje këtë marrëdhënie. “Ne kurrë nuk e prisnim këtë nga një fqinj. Gjithmonë kemi kërkuar të ruajmë marrëdhënie të mira me Iranin, por justifikimet që po përdoren janë të papranueshme”, tha ai.

Megjithatë, Al Thani theksoi se përshkallëzimi ushtarak vetëm sa do ta thellojë krizën dhe bëri thirrje për ulje të tensioneve. Ai kërkoi gjithashtu nga Shtetet e Bashkuara që të kontribuojnë në qetësimin e situatës, duke paralajmëruar për rrezikun që i gjithë rajoni të përfshihet në luftë.

Kryeministri shtoi se një pjesë e sulmeve iraniane kanë shënjestruar edhe objekte civile, përfshirë aeroporte, infrastrukturë uji dhe instalime gazi. Sipas tij, rreth 25% e sulmeve kanë pasur në shënjestër struktura civile.

Ai paralajmëroi gjithashtu për pasojat globale të konfliktit. Katari furnizon rreth 20% të gazit natyror në botë dhe është një nga prodhuesit më të mëdhenj të plehrave kimike, çka do të thotë se çdo destabilizim në rajon mund të ndikojë në tregjet ndërkombëtare, furnizimin me ushqime dhe ekonominë globale.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)