Irani nuk tërhiqet, e mbyll sërish Ngushticën e Hormuzit

Tensionet mes SHBA-ve dhe Iranit vijojnë të ndikojnë drejtpërdrejt në tregjet globale, pasi Teherani ka njoftuar se Ngushtica e Hormuzit do të qëndrojë e mbyllur deri në heqjen e bllokadës amerikane ndaj porteve iraniane.

Sipas Gardës Revolucionare iraniane, çdo anije që tenton t’i afrohet kësaj zone do të konsiderohet si bashkëpunëtore me “armikun”, duke rritur ndjeshëm rrezikun për përshkallëzim të situatës në një nga rrugët më të rëndësishme detare në botë.

Nga ana tjetër, presidenti amerikan Donald Trump ka deklaruar se bllokada do të mbetet në fuqi derisa të arrihet një marrëveshje me Iranin, duke e bërë të paqartë afatin e zgjidhjes së krizës.

Ngushtica e Hormuzit është jetike për furnizimin global me energji, pasi përmes saj kalon rreth një e pesta e naftës dhe gazit të lëngshëm në botë. Çdo mbyllje e zgjatur pritet të ketë pasoja të mëdha ekonomike.

Pas një rihapjeje të shkurtër, Irani e riktheu vendimin për mbyllje, duke shkaktuar luhatje të forta në tregjet e naftës, ndërsa humbjet globale kanë kaluar mbi 50 miliardë dollarë që nga fillimi i konfliktit.

Irani nxjerr “flotën e mushkonjave” kundër anijeve tregtare në Hormuz

Përshkallëzimi i tensioneve në Ngushticën e Hormuzit ka rikthyer vëmendjen te taktikat detare të Iranit, veçanërisht përdorimi i të ashtuquajturës “flota mushkonjë”, një grup i madh mjetesh të vogla të armatosura.

Sipas raportimeve, një anije tregtare është qëlluar nga dy mjete të armatosura iraniane, duke rritur shqetësimet për sigurinë në këtë korridor jetik për tregtinë globale. Ndërkohë, udhëheqësi suprem i Iranit, Mojtaba Khamenei, paralajmëroi për “humbje të reja të hidhura”, pavarësisht pretendimeve të SHBA-ve se kanë dobësuar ndjeshëm flotën tradicionale detare të Iranit.

Megjithatë, analistët theksojnë se Garda Revolucionare iraniane vazhdon të përdorë një numër të madh skafesh të shpejta të pajisura me mitralozë, granatahedhës, si dhe teknologji më të avancuar si raketa dhe dronë. Këto mjete përdoren për të shqetësuar dhe ndjekur anijet në ngushticë.

Një ish-komandant i marinës amerikane theksoi se kjo flotë mbetet një forcë destabilizuese për anijet tregtare dhe për sigurinë në rajon.

Nga ana tjetër, Garda Revolucionare ka paralajmëruar anijet që të mos lëvizin dhe të qëndrojnë të ankoruara në Gjirin Persik, duke theksuar se çdo përpjekje për të hyrë në ngushticë do të konsiderohet bashkëpunim me “armikun”.

Kjo situatë vjen pasi Irani ndryshoi vendimin për rihapjen e përkohshme të Ngushticës së Hormuzit.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)