Sulm me thikë në një metro në Tajvan, 3 viktima e 9 të plagosur

Tre persona humbën jetën dhe 9 të tjerë mbetën të plagosur si pasojë e një sulmi me thikë në një stacion metroje në kryeqytetin e Tajvanit.

Të dhënat zyrtare bëjnë me dije se një 27 vjeçar hyri në stacionin kryesor të metrosë në Taipei dhe hodhi disa tymuese, përpara se të shkonte drejt një stacioni tjetër në një zonë të ngarkuar me dyqane, duke sulmuar njerëzit gjatë rrugës.

Ai është identifikuar si Chang Ëen, i cili më pas humbi jetën pasi ra nga një ndërtesë shumëkatëshe kur u rrethua nga policia.

Sulmi ndodhi gjatë mbrëmjes, ndërsa video të shpërndara në rrjetet sociale tregojnë njerëz që ikin në panik.

Sulmuesi më pas u largua përmes një qendre tregtare nëntokësore drejt stacionit Zhongshan, rreth 800 metra larg. Pas një ndalesë në hotel për të marrë një armë, ai u kthye në rrugën përballë stacionit Zhongshan dhe hodhi sërish bomba tymuese, duke sulmuar edhe më shumë njerëz.

Ngjarje të tilla janë të rralla në Tajvan, i cili ka norma të ulëta të kriminalitetit të dhunshëm. Sulmi i fundit i ngjashëm në Taipei ndodhi më shumë se një dekadë më parë, në vitin 2014.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)