Tajvani e mbyll 2025 nën rrethimin kinez, nis stërvitja ushtarake e Pekinit

Kina njoftoi të hënën se do të nisë stërvitje të mëdha ushtarake rreth Tajvanit këtë javë, duke këmbëngulur se synon që të bindë ishullin t'i japë fund "provokimeve të papërgjegjshme".

"Duke filluar nga 29 dhjetori, Komanda Lindore e ushtrisë kineze do të vendosë forcat tokësore, marinën, forcat ajrore dhe forcat raketore për të kryer ushtrime të përbashkëta ushtarake të quajtura Misioni për Drejtësi 2025", tha një deklaratë Koloneli Shi Yi, një zëdhënës i komandës.

Qëllimi i ushtrimeve është të testohet gatishmëria luftarake dhe të dërgohet një mesazh kundër çdo hapi drejt pavarësisë së Tajvanit.

Ky është raundi i gjashtë i madh i ushtrimeve ushtarake kineze që nga viti 2022.

"Këto ushtrime shërbejnë si një paralajmërim serioz për forcat separatiste të 'Pavarësisë së Tajvanit' dhe forcat e huaja që ndërhyjnë", shtoi Shi.

Stërvitjet filluan 11 ditë pasi SHBA-të njoftuan një shitje armësh Tajvanit me vlerë 11.1 miliardë dollarë, paketa më e madhe e armatimit e dakordësuar ndonjëherë për ishullin, duke shkaktuar një protestë nga Ministria e Mbrojtjes e Kinës dhe paralajmërime se ushtria do të "merrte masa të forta" në shenjë përgjigjeje.

Zyra e presidentit tajvanez dënoi fort nisjen e ushtrimeve ushtarake nga Kina dhe i bëri thirrje Pekinit të "jetë racional, i përmbajtur dhe të ndalojë menjëherë provokimet e papërgjegjshme" në mënyrë që të mos jetë ai që dëmton paqen rajonale.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)