Zotimi i presidentit kinez për vitin e ri: Do të bashkohemi me Tajvanin

Presidenti i Kinës, Xi Jinping, ka riafirmuar synimin e Pekinit për të “ribashkuar” Kinën me Tajvanin gjatë fjalimit të tij vjetor të Vitit të Ri në Pekin. Deklarata erdhi vetëm një ditë pas përfundimit të stërvitjeve intensive ushtarake kineze rreth Tajvanit.

Xi u shpreh se “ribashkimi i atdheut, një prirje e kohës, është i pandalshëm”, duke theksuar se Kina e konsideron Tajvanin pjesë të territorit të saj dhe nuk përjashton përdorimin e forcës për aneksimin e ishullit vetëqeverisës. SHBA-të kanë shprehur shqetësim në rritje për aftësitë ushtarake të Kinës për të ndërmarrë një sulm të tillë.

Stërvitjet ushtarake të quajtura “Justice Mission 2025” përfshinë rrethimin e ishullit kryesor të Tajvanit, simulimin e një bllokade portesh dhe përdorimin e forcave detare, ajrore dhe raketore. Në to morën pjesë të paktën 89 avionë luftarakë, shifra më e lartë e regjistruar në më shumë se një vit. Analistët i lidhën këto veprime edhe me miratimin nga SHBA i një pakete rekord prej 11 miliardë dollarësh armësh për Tajvanin.

Në fjalim, Xi theksoi gjithashtu rolin global të Kinës, konferencat ndërkombëtare të mbajtura këtë vit dhe zhvillimet në teknologji të lartë, si misioni hapësinor Tianëen-2. Ai përmendi edhe suksesin e produkteve kulturore kineze dhe tha se ekonomia kineze është në rrugën e duhur për të arritur rritje 5% të PBB-së.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)