Shpërthime dhe sirena sulmesh ajrore në Venezuelë, Maduro shpall gjendjen e jashtëzakonshme

Sirena sulmesh ajrore dhe shpërthime u dëgjuan në orët e para të së shtunës në kryeqytetin venezuelian, Karakas dhe mediat atje raportojnë se Presidenti Nicolas Maduro ka shpallur gjendjen e jashtëzakonshme.

Sipas raportimeve, një nga objektet që është goditur është Kalaja Tiuna në anën jugore të qytetit, kompleksi kryesor ushtarak i Venezuelës, ku ndodhen ndër të tjera edhe Ministria e Mbrojtjes dhe Akademia Ushtarake.

Shpërthimi i parë u regjistrua afërsisht në orën 1:50 të mëngjesit sipas kohës lokale. "Një shpërthim ishte aq i fuqishëm sa dritarja ime u drodh pas tij", tha korrespondenti i CNN.

Bombardimet rezultuan gjithashtu në ndërprerjen e energjisë elektrike në këtë zone të kryeqytetit.

Mediat venezueliane Efecto Cocuyo dhe Tal Cual Digital raportojnë se shpërthime u dëgjuan edhe në shtetin La Guaira, në veri të Karakasit, si dhe në aeroportin e Higuerote, një qytet në bregdetin e shtetit Miranda.

Video të tjera që qarkullojnë në rrjet tregojnë helikopterë ushtarakë që fluturojnë mbi Karakas, pa asnjë informacion, për momentin, nga pala amerikane apo venezueliane. Donald Trump ka kohë që  ka përmendur mundësinë e ndërhyrjes ushtarake kundër Karakasit për shkak të luftës së tij ndaj narkotrafikantëve. Në tetor, presidenti amerikan tha se kishte autorizuar CIA-n të vepronte brenda Venezuelës për të goditur flukset e paligjshme të migrantëve dhe drogës nga vendi i Amerikës së Jugut.

Udhëheqësi venezuelian Nicolas Maduro, nga ana e tij, hodhi poshtë akuzat e Trump se qeveria e tij po ndihmon tregtinë globale të drogës, duke akuzuar Shtëpinë e Bardhë se ka shpikur një arsye për të sulmuar vendin e Amerikës së Jugut. Venezuela, tha ai, është gati të punojë me partnerët amerikanë për të luftuar tregtinë e drogës.

09:59 -  Zyrtari amerikan konfirmon sulmin në Venezuelë, Maduro: Agresion serioz, do të mbrohemi!

Një zyrtar amerikan konfirmoi për Reuters, në kushte anonimiteti, se forcat e Shteteve të Bashkuara kryen mëngjesin e sotëm sulme ushtarake ndaj Venezuelës.

Sirena për sulme ajrore dhe shpërthime u dëgjuan në orët e para të së shtunës në kryeqytetin Karakas. Sipas informacioneve paraprake, një nga objektivat e goditura ishte Kalaja Tiuna, kompleksi kryesor ushtarak në jug të qytetit, ku ndodhen Ministria e Mbrojtjes dhe Akademia Ushtarake.

Pas zhvillimeve, presidenti venezuelian Nicolás Maduro shpalli vendin në gjendje të jashtëzakonshme, duke folur për një “agresion serioz ushtarak”. Në një deklaratë zyrtare të lëshuar të shtunën në mëngjes, qeveria venezueliane tha se “hedh poshtë dhe denoncon para bashkësisë ndërkombëtare agresionin shumë serioz ushtarak” nga SHBA-të, duke pretenduar se sulmet kishin në shënjestër objektiva civile dhe ushtarake në Karakas dhe në shtetet Miranda, Aragua dhe La Guaira.

Autoritetet bënë thirrje për mobilizim mbarëkombëtar, duke theksuar se vendi do të mbrohet ndaj sulmeve dhe duke akuzuar Uashingtonin për përpjekje për ndryshim regjimi. Po ashtu, Karakasi kërkoi një mbledhje të menjëhershme të Këshillit të Sigurimit të OKB-së, ndërsa rreth pallatit presidencial Miraflores u raportua alarm i shtuar, mobilizim i forcave të sigurisë dhe kontrolle.

Ndërkohë, CBS News raporton se ish-presidenti amerikan Donald Trump kishte dhënë miratimin për sulme ushtarake në Venezuelë disa ditë më parë, kryesisht kundër instalimeve ushtarake, duke cituar dy zyrtarë amerikanë në kushte anonimiteti.

Komente (0)