Kina po tenton të pushtojë detet e oqeanet, ngrihet alarmi në SHBA

Kina ka përshpejtuar ndjeshëm ndërtimin e nëndetëseve me energji bërthamore gjatë pesë viteve të fundit, duke i kaluar Shtetet e Bashkuara për nga numri i mjeteve të lëshuara në ujë, sipas një raporti të publikuar nga International Institute for Strategic Studies. Sipas analizës, nga viti 2021 deri në 2025, Kina ka lëshuar 10 nëndetëse me një total prej 79 mijë tonësh, krahasuar me 7 nëndetëse amerikane me 55,500 tonë.

Raporti, i bazuar në imazhe satelitore të kantierëve detarë, thekson se kjo përfaqëson një ndryshim të madh krahasuar me periudhën 2016-2020, kur SHBA kishte epërsi të qartë në prodhim. Megjithatë, në flotën aktive, Uashingtoni vijon të mbajë avantazh të konsiderueshëm. Sipas “Military Balance 2025”, Kina ka aktualisht 12 nëndetëse bërthamore aktive, ndërsa SHBA disponon 65, përfshirë 14 me raketa balistike.

Zgjerimi i flotës kineze është mbështetur nga investime të mëdha në kantierin Huludao të kompanisë Bohai Shipbuilding Heavy Industry Co.. Raporti, i titulluar “Boomtime at Bohai”, vë në dukje edhe lëshimin e dy nëndetëseve të tipit Type 094, të afta për të mbajtur raketa balistike me kapacitet bërthamor, duke forcuar kështu triadën bërthamore të Pekinit.

Nga ana tjetër, një raport i Congressional Research Service paralajmëron se Marina amerikane po mbetet pas objektivit për ndërtimin e dy nëndetëseve të klasës Virginia në vit. Programi për nëndetëset Columbia po përballet gjithashtu me vonesa.

Sipas IISS, rritja e numrit të nëndetëseve kineze paraqet një sfidë në rritje për SHBA-në dhe aleatët perëndimorë, duke rrezikuar të zbehë epërsinë tradicionale detare të Uashingtonit.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)