Vranë kandidatin për President dhe shqiptarin në Kolumbi, kapet grupi i “killerave” me 9 anëtarë

Një grup killerash me pagesë, me 9 anëtarë, që dyshohet se kanë kryer vrasjen e 44-vjeçarit shqiptar Artur Tushi, si dhe kandidatit për President të Kolumbisë, Miguel Uribe Turbay, është goditur nga policia në Medelin.

Hetimi për grupin nisi pas zbulimit të transfertave multimilonëshe në kriptovaluta, të cilat dyshohet se janë kryer për të financuar vrasjet e bujshme të viteve të fundit në Kolumbi. Sipas autoriteteve grupi kriminal, i njohur si “La Oficina Premium” synonte eleminimin fizik kundrejt pagesës, të shtetasve të huaj me status të lartë në Medelin dhe qytete të tjera të Kolumbisë.

Ata qëndrojnë pas katër vrasjeve të shtetasve të huaj në kryeqytetin e Antioquia-s dhe kanë lidhje të mundshme me vrasjen e kandidatit presidencial Miguel Uribe Turbay.

Nëntë anëtarët e grupit u gjetën dhe u arrestuan në një banesë në lagjen Kennedy, në Komunën 7 të Medelit veriperëndimor.  Gjatë operacionit, u sekuestruan tetë armë zjarri, përfshirë një mitraloz dhe disa revolverë. Kryetari i bashkisë së Medelin, Federico Gutiérrez, tregoi se armët do t'i nënshtrohen Sistemit të Unifikuar të Krahasimit Balistik për të përcaktuar nëse ato janë përdorur në vrasje të tjera.

Përveç kësaj, autoritetet gjetën 29 telefona celularë, shumë prej të cilëve me linja ndërkombëtare, si dhe dokumentacion që mund ta lidhte organizatën me rrjete kriminale në Shtetet e Bashkuara dhe vende të tjera.

Vrasjet e të huajve nën hetim

Një ndër vrasjet e kryera nga “La Oficina Premium” është ajo e 54-vjeçarit meksikan Horacio Pérez Ledezma, një tregtar produktesh teknologjike, i cili u sulmua ndërsa drekonte në një restorant në sektorin Provenza, në El Poblado. Për këtë krim po hetohet edhe José Arteaga Hernández, i njohur ndryshe si "El Costeño" ose "Chipi", i cili dyshohet se është përfshirë edhe në vrasjen e Miguel Uribe Turbay.

Foto: Zyra e Prokurorit Medellin

Viktima tjetër është shqiptari Artur Tushi, i cili mbante edhe nënshtetësinë ekuadoriane, i cili u qëllua me 11 plumba pranë qendrës tregtare Santafé në El Poblado. Sipas hetuesve kolumbianë kjo vrasje lidhet me aktivitete të paligjshme që përfshijnë trafikimin e qenieve njerëzore dhe trafikun e drogës, me pjesëmarrjen e organizatave kriminale shqiptare, ekuadoriane dhe kolumbiane.

Autoritetet nuk kanë publikuar detaje rreth vrasjeve të qytetarëve amerikanë dhe kanadezë të përmendur në hetimin paraprak. Megjithatë, dy qytetarë kanadezë janë vrarë në Medelin në tre vitet e fundit.

Një nga këto incidente ndodhi më 31 janar të vitit të kaluar në Mall del Indio, ku u vra 42-vjeçari Jonathan Christopher Acevedo García. Krimi dyshohet se është urdhëruar nga ish-atleti olimpik Ryan James Wedding, pasi viktima u identifikua si dëshmitar kyç kundër tij.

Rasti tjetër përfshin Jesse Marcel Arrigo, i cili u vra në një restorant të vendosur në rrugën Las Palmas, pranë lagjes së San Diegos. I ndjeri u paraqit si Komisioner Ndërkombëtar i Paqes, megjithëse përballej me akuza për mashtrim në vendin e tij.

Pagesat miliona dollarëshe

Një nga aspektet më mbresëlënëse të hetimit është shuma që organizata faturonte për secilin krim. Sipas autoriteteve, vrasjet e të huajve kushtonin midis 400,000 dhe 500,000 dollarëve, ose rreth 1.83 miliardë pesos kolumbiane, varësisht nga profili i viktimës dhe kompleksiteti i goditjes.

Hetimi sugjeron se pagesat mund të jenë bërë përmes transfertave në llogari në parajsa fiskale ose përmes kriptovalutave, me qëllim pengimin e gjurmimit financiar dhe shmangien e gjurmueshmërisë së operacioneve.

Kryebashkiaku Gutiérrez deklaroi se po hetohet përfshirja e mundshme e organizatave transnacionale që dyshohet se kanë urdhëruar krime jo vetëm në Kolumbi, por edhe në Meksikë, Republikën Dominikane dhe Kili.

Gjatë bastisjes, autoritetet gjetën një altar me figura fetare, qirinj dhe sende të lidhura me praktikat ezoterike. Sipas informacionit zyrtar të marrë nga El Colombiano , anëtarët e grupit dyshohet se kryenin ritualet Santería përpara se të kryenin krimet, përfshirë sakrifikimin e të paktën katër dhive.

Sipas zyrës së Kryetarit të Bashkisë, këto rituale kishin një qëllim të dyfishtë, pasi së pari, anëtarët e grupit kërkonin mbrojtje shpirtërore përpara se të kryenin vrasjet dhe, në të njëjtën kohë, të mashtronin klientët përmes premtimeve për mbrojtje ose sukses në aktivitete të paligjshme, duke u dërguar atyre regjistrime audiovizuale të akteve të dyshuara ezoterike.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)