Përplasen trenat në Indonezi, 14 të vdekur dhe 84 të plagosur

14 të vdekur dhe 84 të plagosur është bilanci i një aksidenti tragjik në Indonezi, ku një tren i distancave të gjata u përplas me një tren udhëtarësh jashtë Xhakartës.

Përplasja midis trenave ndodhi vonë të hënën në Bekasi, në periferi të Xhakartës.

Bobby Rasyidi, drejtor ekzekutiv i firmës shtetërore hekurudhore të Indonezisë PT KAI, tha se numri i të vdekurve ishte rritur në 14 persona dhe se puna e ekipeve të shpëtimit ishte ende duke vazhduar për të nxjerrë të mbijetuarit e bllokuar nën rrënoja.

Foto: AP/Tatan Syuflana

Mohammad Syafii, kreu i agjencisë së kërkim-shpëtimit të Indonezisë, tha në një konferencë për shtyp herët të martën se ishte një proces delikat për të shpëtuar të mbijetuarit nga vagonët e dëmtuar.

“Duhej të përfshihej personel me aftësi të caktuara për të kryer një nxjerrje të matur. Ka disa të plagosur që janë gjallë deri në këtë moment dhe shpresojmë t'i nxjerrim, por ata janë ende të bllokuar nga materialet e trenit”, tha ai.

Një e mbijetuar tregoi momentet e para pas përplasjes teksa njerëzit ndodheshin të bllokuar brenda vagonëve të dëmtuar.

Foto: AP/Tatan Syuflana

“Mendova se do të vdisja”, tha Sausan Sarifah nga shtrati i saj në spitalin RSUD Bekasi, ku u shtrua me një krah të thyer dhe një prerje të thellë në njërën kofshë. Ajo ishte duke u kthyer në shtëpi nga puna, kur treni i saj ndaloi në stacionin Bekasi Timur rreth 25 km nga Xhakarta.

“Gjithçka ndodhi kaq shpejt, në një fraksion sekonde. Pati dy njoftime nga treni i udhëtarëve. Të gjithë ishin gati të zbrisnin dhe pastaj papritmas dëgjohej zhurma e lokomotivës, me të vërtetë e lartë. Nuk kishte kohë për të dalë dhe të gjithë përfunduan të grumbulluar brenda trenit, të shtypur mbi njëri-tjetrin. Nuk e di si është personi poshtë meje”, tha Sausan.

Foto: AP/Tatan Syuflana

Në stacion, skena kaotike pati pas përplasjes, me punonjësit e shpëtimit që bërtisnin për bombola oksigjeni ndërsa ambulancat qëndronin në radhë gjarpëruese, me dritat që ndizeshin.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)