Shuhet në moshën 40-vjeçare këngëtari Shpat Kasapi

Bota e muzikës shqiptare është tronditur thellë nga lajmi i ndarjes së papritur nga jeta të Shpat Kasapit, një prej këngëtarëve më të famshëm. Ai ndërroi jetë në Itali në moshën 40-vjeçare si pasojë e një sulmi në zemër. Largimi i tij i parakohshëm ka lënë një boshllëk të madh te familja, miqtë, kolegët dhe publikun që u rrit me këngët e tij.

Këngëtari nga Tetova, i cili prej fillimit të viteve 2000 u bë një ikonë e skenës moderne shqiptare, ndodhej atje së bashku me ish-bashkëshorten, Selvije Jaon, dhe djalin e tyre të vogël, Roelin, të cilin po e çonin për kontroll mjekësor. Sipas të vëllait, Shpati kishte pasur shqetësime të vogla në zemër, por asgjë alarmante. Edhe pse iu dha ndihma e parë, ai nuk arriti të mbijetojë.

Selvije Jao tregoi me dhimbje se momentet e fundit të Shpatit ndodhën në krahët e saj. Në një rrëfim prekës, ajo zbuloi se ishin të lodhur, të stresuar, por të bashkuar për të siguruar dokumentet e djalit, i cili është në spektrin e autizmit dhe kishte nevojë për trajtim të specializuar në Itali. Ajo theksoi se pavarësisht divorcit, marrëdhëniet e tyre kanë qenë gjithmonë të mira për hir të Roelit. Me fjalë plot dhimbje, ajo tregoi frikën, tronditjen dhe pikëllimin e pafund që la pas largimi i tij i papritur.

Printscreen: Instagram/SelvijeJaho

Humbja e Shpat Kasapit ka prekur thellë. Figura të njohura të muzikës dhe ekranit, si Vesa Luma, Arbana Osmani, Dafina Zeqiri, Ermal Fejzullahu dhe Big Basta, kanë ndarë mesazhe të ndjera, duke e kujtuar si një djalë të mirë, pozitiv, fisnik dhe plot jetë. Të gjithë e përshkruajnë Shpatin si një njeri të rrallë, energjik dhe të dashur, që la gjurmë të pashlyeshme në muzikë dhe në zemrat e publikut.

Largimi i tij është një humbje e madhe për të gjithë. Shpati do të kujtohet për muzikën, karakterin dhe buzëqeshjen që nuk kurseu kurrë.

Komente (0)