Nën tingujt e Gipsy Kings, lamtumira e fundit për Brigitte Bardot

Dhjetë ditë pas vdekjes, më 28 dhjetor 2025 në shtëpinë e saj në Madrague, bota i ka dhënë lamtumirën e fundit Brigitte Bardot. Homazhet u zhvilluan në Saint-Tropez, qyteti që e ka lidhur më shumë emrin me famën e saj botërore.

Pas një ceremonie private, ashtu siç e kishte kërkuar vetë 91-vjeçarja, aktorja e famshme ka kaluar për herë të fundit nëpër rrugët e qytetit, drejt varrezave pranë detit. Shoqërimi u shoqërua nga duartrokitjet në shenjë nderimi nga fansat e shumtë, të cilët ishin mbledhur mes kishës dhe ekranit të madh të vendosur pranë portit.

Ikona e kinemasë dhe mbrojtësja e kafshëve do të prehet pranë prindërve dhe gjyshërve të saj, përballë Detit Mesdhe, jo larg varrit të bashkëshortit të parë, Roger Vadim. Për nder të saj, Chico, këngëtari i njohur i Gipsy Kings, interpretroi këngën “Djobi Djoba”, një melodi që lidhet ngushtë me Brigitte Bardot. Ajo e ka mbështetur grupin prej viteve ’70, kur ata ishin ende në fillimet e karrierës. Jo rastësisht, një prej këngëve më të njohura të grupit, “La Dona”, i është dedikuar pikërisht asaj.

Në ceremoninë e varrimit ishin të pranishëm personalitete nga bota e artit dhe e politikës. Në një intervistë të gjatë për revistën “Paris Match”, Bernard d'Ormale, bashkëshorti i Brigitte Bardot, zbuloi se shkaku i vdekjes së saj ishte kanceri. D'Ormale ka treguar se gjatë muajve të fundit të jetës, Brigitte kishte shprehur disa herë dëshirën për t'u larguar për shkak të dhimbjeve të mëdha fizike.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)