Seanca e radhës më 29 prill, Gjykata e Posaçme e Apelit shtyn shqyrtimin për Veliajn

Gjykata e Posaçme e Apelit ka vendosur të shtyjë për datën 29 prill shqyrtimin e ankimit të kryetarit të Bashkisë së Tiranës, Erion Veliaj, lidhur me një vendim të Shkallës së Parë për afatet e paraburgimit. Sipas vendimit, seanca u shty për shkak të një problemi procedural të konstatuar gjatë dokumentacionit të paraqitur nga institucioni i paraburgimit.

Avokati mbrojtës i Veliajt, Plarent Ndreca deklaroi për mediat se shtyrja ishte e justifikuar, duke theksuar se në dosje kishte një parregullsi në mënyrën e firmosjes së dokumenteve nga drejtuesi i institucionit. “Seanca u shty për shkak të një parregullsie në siglimin e dokumentit nga institucioni i paraburgimit. Ishte një çështje formale, që nuk duhej të krijonte pasoja dhe gjykata vendosi ta shtyjë për disa ditë”, njoftoi Ndreca.

Ai shtoi gjithashtu se praktika të tilla duhet të ndryshohen, pasi sipas tij mund të ndikojnë jo vetëm tek Veliaj, por edhe tek të paraburgosurit e tjerë, duke krijuar vonesa të panevojshme në proceset gjyqësore. Seanca e radhës pritet të zhvillohet më 29 prill, ku gjykata do të vijojë shqyrtimin e ankimit.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)