Rama pret ambasadorin e SHBA në NATO, zbardhen temat e diskutimit

Kryeministri Edi Rama ka pritur në një takim Ambasadorin e SHBA në NATO, Matthew Whitaker, i cili është duke zhvilluar një vizitë në vendin tonë.

Kreu i qeverisë bën me dije se foli me ambasadorin amerikan për marrëdhëniet dypalëshe, çështjet e sigurisë, por edhe për samitin e NATO-s, që pritet të mbahet vitin e ardhshëm në vendin tonë.

“Në Kryeministri, me Ambasadorin e SHBA në NATO, Matthew Whitaker, folëm për lidhjen e ngushtë mes vendeve tona, partneritetin strategjik mes shteteve tona, marrëdhëniet tona të shkëlqyera diplomatike e ushtarake, forcimi i të cilave është prioritet i përbashkët, si edhe për Samitin e NATO-s vitin e ardhshëm në Tiranë, ku Shqipëria do të bëhet pikëtakimi i aleancës më të madhe ushtarake të botës”, shkruan Rama.

Ndërkohë, më herët, ambasadori Whitaker ka ndarë disa foto dhe video nga vizita në bazën ajrore në Kuçovë dhe takimin e tij me kryeministrin.

“Në Shqipëri, pata një tur informues mbi Bazën Ajrore të Kuçovës nga Ministri i Mbrojtjes Ermal Nufi. Shqipëria është gjithnjë e më e aftë në mbrojtjen kibernetike, i përkushtuar ndaj Bordit të Paqes dhe Forcës Ndërkombëtare të Stabilizimit në Gaza, dhe më shumë. Duke diskutuar me Kryeministrin Rama dhe ekipin e tij, theksova se mezi presim të shohim se çfarë mund të arrihet më shumë për lëvizshmërinë ushtarake sapo Shqipëria të arrijë objektivin e Presidentit Trump për shpenzime mbrojtëse prej 5% të PBB-së”, shkruan ambasadori.

Kujtojmë se ambasadori Whitaker prej disa ditësh ka nisur një tur në vendet e Ballkanit Perëndimor.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)