Akuzohej se mori 700 euro nga i burgosuri, jepet dënimi për ish-shefin e regjimit në burgun e Lushnjes

Një rast korrupsioni në sistemin penitenciar ka marrë fund me një vendim nga Gjykata e Posaçme kundër Korrupsionit dhe Krimit të Organizuar, e cila shpalli fajtor ish-shefin e regjimit në burgun e Lushnjes, Irakli Leka.

Sipas vendimit, Leka është dënuar për veprën penale “Korrupsioni pasiv i personave që ushtrojnë funksione publike”, parashikuar nga neni 259/2 i Kodit Penal. Ai u dënua fillimisht me 3 vite e 3 muaj burg, por për shkak të gjykimit të shkurtuar dënimi iu ul në 2 vite e 2 muaj.

Irakli Leka u arrestua në shtator 2025, pasi akuzohej se kishte marrë 700 euro nga një i burgosur në këmbim të dhënies së një lejeje të përkohshme. Çështja u referua në gjykatë nga Prokuroria e Posaçme kundër Korrupsionit dhe Krimit të Organizuar.

Gjykata vendosi pezullimin e ekzekutimit të dënimit me burg, duke e vënë të pandehurin në shërbim prove për 2 vite, me kusht që të mos kryejë tjetër vepër penale dhe të mbajë kontakte me Shërbimin e Provës. Po ashtu, u shfuqizua masa e “arrestit në shtëpi”.

Si masë plotësuese, Lekës iu hoq e drejta për të ushtruar funksione publike për 5 vite. Vendimi mund të ankimohet brenda 15 ditëve në Apelin e Posaçëm.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)