“Të ulim çmimin e karburanteve”, Tedi Blushi: Projektligjin e depozituam para dy javësh, qeveria nuk reagon

Sekretari i Përgjithshëm i Partisë së Lirisë, Tedi Blushi, u bëri thirrje deputetëve të Kuvendit të Shqipërisë që të miratojnë me urgjencë projektligjin e paraqitur nga kjo forcë politike për uljen e çmimit të karburanteve. Sipas tij, kanë kaluar gati dy javë nga depozitimi i nismës në Kuvend, ndërsa ende nuk ka pasur reagim nga qeveria dhe mazhoranca.

Në një deklaratë për mediat, Blushi akuzoi kryeministrin Edi Rama dhe shumicën parlamentare se po neglizhojnë një problem që prek drejtpërdrejt familjet dhe bizneset shqiptare. Ai theksoi se çmimi i naftës në Shqipëri ka arritur rreth 200 lekë për litër dhe se më shumë se 60 për qind e këtij çmimi përbëhet nga taksa që shkojnë në buxhetin e shtetit.

“Sot çmimi i naftës në Shqipëri ka arritur rreth 200 lekë për litër, ndërkohë që mbi 60% e këtij çmimi janë taksa që shkojnë drejtpërdrejt në buxhetin e shtetit. Partia e Lirisë beson se e vetmja politikë reale dhe që ndihet në xhepin e qytetarit është ulja e taksave”. Sekretari i PL i bëri llogaritë me zëra, për të treguar se ka hapësirë për të ulur çmimin.

“Njerëzit më të pasur të botës vijnë në Shqipëri të furnizojnë jahtet e tyre me karburant pa taksa, por shqiptarët rëndohen nga e njëjta qeveri me taksa abuzive për çdo litër karburant. Qytetarët paguajnë 27 lekë për litër taksë qarkullimi, e cila me TVSH shkon në rreth 32 lekë për litër. Në të njëjtën kohë, shqiptarët paguajnë dy herë për rrugët: një herë përmes taksës së regjistrimit dhe kolaudimit të automjeteve, rreth 70 mijë lekë në vit dhe sërish përmes taksës së qarkullimit në çdo litër karburanti. Nga kjo taksë qeveria mbledh rreth 300 milionë euro në vit, por shpenzon vetëm 55 milionë euro për mirëmbajtjen”, tha ai.

Tedi Blushi shtoi gjithashtu se Shqipëria ka çmimet më të larta të karburanteve në rajon, ndërsa qytetarët përballen me paga dhe fuqi blerëse më të ulët krahasuar me vendet fqinje. Sipas tij, diferenca e madhe e çmimeve me vendet e rajonit rëndon ndjeshëm ekonominë e familjeve dhe bizneseve shqiptare.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)