Rikthehen shiu dhe dëbora, e premtja me mot të paqëndrueshëm

Dita e premte pritet të karakterizohet nga mot i paqëndrueshëm, me vranësira mesatare deri të dendura në të gjithë territorin.

Reshjet e shiut do të nisin që në orët e para të 24-orëshit, fillimisht në veri dhe jug të vendit, për t’u shtrirë gradualisht në të gjithë territorin. Në përgjithësi, ato do të jenë me intensitet të ulët, ndërsa lokalisht priten reshje me intensitet mesatar.

Gjatë orëve të mëngjesit, në ekstremin verior, në disa zona lindore dhe në jug, reshjet mund të marrin formën e shtrëngatave me intensitet deri të lartë, të shoqëruara me shkarkesa elektrike.

Pas mesditës, reshjet do të vijojnë kryesisht me intensitet të ulët në pjesën më të madhe të vendit, ndërsa në zona të izoluara priten shtrëngata afatshkurtra.

Në zonën e Alpeve dhe në verilindje–juglindje, në lartësitë mbi 800-900 metra, parashikohen reshje dëbore me intensitet të ulët dhe lokalisht mesatar.

Era do të fryjë me drejtim juglindje–jugperëndim, me shpejtësi mesatare rreth 7 m/s. Përgjatë vijës bregdetare dhe në zonat luginore, era mund të arrijë deri në 16 m/s.

Në det, valëzimi parashikohet të jetë i forcës 2 deri në 4 ballë.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)