Arsenal i pandalshëm, “blindon” vendin e parë në Premier League

Triumf me katër gola përballë Aston Villa-s, Manchester United dhe Chelsea e mbyllin vitin me barazime zhgënjyese.

31.12.2025. 09:52

Arsenal i pandalshëm, “blindon” vendin e parë në Premier League

Java e 19-të e Premier League, e zhvilluar gjatë kësaj mesjave, konfirmoi formën e shkëlqyer të Arsenalit. “Topçinjtë” fituan përballjen direkte kundër Aston Villa-s, me rezultatin e thëllë 4-1.

Gabriel, Zubimendi, Trossard dhe në fund Gabriel Jesus vulosën “pokerin” fitues, që i dha fund ecurisë pozitive të Aston Villa-s. Me këtë triumf, skuadra e Mikel Artetës konsolidon vendin e parë në renditje, duke ruajtur diferencën me 5 pikë nga ndjekësit e Manchester City-t, që duhet të reagojë në ndeshjen e prag Vitit të Ri ndaj Sunderland.

Ndërkohë, Manchester United dhe Chelsea u ndalën në barazime. “Djajtë e Kuq” u frenuan në shtëpi në shifrat 1-1 nga Wolverhampton. Pavarësisht avantazhit me Zirkzee, në minutën e 27-të, vendasit u ndëshkuan në fundin e pjesës së parë nga Krejci. Në minutën e 91-të, United mendoi se kishte shënuar golin e fitores me Dorgu, por rrjeta u anulua për pozicion jashtë loje.

Spektakël dhe barazim 2-2 në “Stamford Bridge” ndërmjet Chelsea dhe Bournemouth. Rrjetat e Cole Palmer dhe Enzo Fernandez nuk i mjaftuan bluve të Londrës të merrnin maksimumin e pikëve.

Shkarkoni aplikacionin Newsmax Balkans:

Komente (0)