Eliminimi nga Champions i kushton Interit 20 milionë euro

Pas eliminimit të papritur në Champions nga Bodø/Glimt, arkat e Interit kanë humbur 20 milionë euro. Shifra ndahet në 11 milionë euro të garantuara nga kalimi në fazën e 1/8, si edhe afro 9 milionë euro të mundshme nga shitja e biletave për ndeshjet.

Bëhet fjalë për një humbje domethënëse, për një klub që mbështet një pjesë të rëndësishme të buxhetit te të ardhurat nga kupat e Europës. Në teori, Interi mund ta zbusë disi goditjen financiare me fitimin e Serie A apo të Kupës së Italisë. Por, këto objektiva duhen arritur fillimisht në fushë dhe nuk do ta mbulonin plotësisht boshllëkun e krijuar.

Kjo ka nxitur skenarët që lidhen me merkaton e verës. Humbjet financiare në Champions do të mbuloheshin nga shitja e disa lojtarëve. Emrat që mund të largohen, do të varen nga ofertat që do të mbërrijnë. Edhe disa të ashtuquajtur “të paprekshëm”, mund të mos jenë më të tillë.

Mes emrave të përfolur janë Marcus Thuram, për të cilin ka pasur zëra edhe verën e kaluar për një kalim të mundshëm te Juventusi, Hakan Çalhanoğlu, i kërkuar shpesh nga klubet turke, Nicolò Barella si edhe Davide Frattesi. Ndërkohë, sezoni i ardhshëm mund të sjellë më tepër hapësira për Francesco “Pio” Esposito, duke ndikuar në hierarkitë e sulmit zikaltër.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)