Ronaldo rikthehet në futbollin spanjoll pas 9 vitesh... në kategorinë e dytë

Ndërsa është në moshën 41-vjeçare dhe ende vazhdon të luajë në nivelet më të larta të futbollit, Cristiano Ronaldo tashmë po mendon seriozisht për të ardhmen, teksa ka blerë 25% të aksioneve të klubit spanjoll UD Almería, që aktualisht garon në kategorinë e dytë të futbollit. Investimi është realizuar përmes kompanisë së tij CR7 Sports Investments, ndërsa shuma nuk është bërë publike.

41-vjeçari, i cili u shpall miliarder nga Forbes vitin e kaluar, deklaroi se investimi përfaqëson një ambicie të kahershme për të kontribuar në futboll përtej fushës së lojës. “UD Almería është një klub me baza të forta dhe potencial të qartë për rritje. Pres me padurim të punoj me drejtuesit për fazën e ardhshme të zhvillimit,” u shpreh ai në një deklaratë zyrtare.

Ky investim shënon edhe rikthimin simbolik të Ronaldos në futbollin spanjoll, pas nëntë sezoneve të suksesshme me Real Madrid, përpara transferimit te Juventus në vitin 2018. Aktualisht ai luan dhe është kapiten i Al‑Nassr dhe i kombëtares së Portugalisë.

Përfshirja e tij vjen një vit pasi klubi spanjoll u ble nga një grup investimi saudit, i drejtuar nga biznesmeni Mohamed Al Khereiji, me të cilin Ronaldo ka marrëdhënie të afërt dhe që besohet se ka ndihmuar në transferimin e tij në Arabinë Saudite në vitin 2022, pas largimit nga Manchester United.

Presidenti i klubit e cilësoi Ronaldon si një nga lojtarët më të mëdhenj të historisë dhe theksoi se përvoja e tij në ligat spanjolle do të jetë e vlefshme për zhvillimin e ekipit dhe akademisë. Aktualisht, Almería renditet e treta në Segunda División dhe synon rikthimin në elitë.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)