Shuhet në moshën 83-vjeçare Kreshnik Tartari, një nga ikonat e volejbollit shqiptar

Sporti shqiptar ka humbur një prej emrave më të rëndësishëm të historisë së tij. Në moshën 83-vjeçare ka ndërruar jetë Kreshnik Tartari, figurë që spikati për dekada si volejbollist, trajner dhe drejtues sportiv. I lindur në Tiranë më 21 korrik 1943, Tartari dha një kontribut të jashtëzakonshëm në zhvillimin dhe sukseset e volejbollit shqiptar.

Karrierën si sportist e ndërtoi me fanellën e Dinamo dhe të ekipit kombëtar, ku u bë pjesë e një brezi që fitoi tituj dhe trofe të shumtë gjatë periudhës së artë të këtij sporti. Megjithatë, emri i tij lidhet më së shumti me sukseset e arritura në pankinë. Tartari konsiderohet ndër trajnerët më të suksesshëm që ka njohur volejbolli shqiptar, falë punës së tij në krijimin dhe formimin e brezave të sportisteve që dominuan garat kombëtare dhe përfaqësuan Shqipërinë në arenën ndërkombëtare.

Foto ilustruese

Kulmi i suksesit erdhi me ekipin e femrave të Dinamos, të cilin e drejtoi drejt një periudhe dominimi të paprecedentë. Duke nisur nga viti 1974, skuadra fitoi 11 kampionate radhazi dhe 20 tituj në total, ndërsa arriti edhe rezultate historike në Europë, duke siguruar një vend mes katër ekipeve më të mira të kompeticionit kontinental. Mbi bazën e këtij ekipi fitues, Tartari ndërtoi edhe përfaqësuesen kombëtare të femrave.

Foto ilustruese

Një nga momentet më të spikatura të karrierës së tij ishte triumfi në Lojërat Mesdhetare 1987, ku Shqipëria arriti të mposhtte Italinë, skuadër e cila ishte kampione e Europës në atë periudhë, duke fituar medaljen e artë dhe titullin kampion të lojërave. Për veprimtarinë dhe arritjet e tij të shumta, Kreshnik Tartari u vlerësua me disa çmime dhe vlerësime të larta, mes tyre edhe titullin “Mjeshtër i Madh”.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)