Vllaznia nuk njeh rivalë në futbollin e femrave, shpallet për herë të 13-të kampione e Shqipërisë

Vllaznia konfirmoi edhe një herë supremacinë në futbollin shqiptar të vajzave, duke fituar titullin kampion për sezonin 2025-2026 pas suksesit 2-0 ndaj Apolonisë në finalen e zhvilluar në stadiumin “Selman Stërmasi” në Tiranë.

Skuadra shkodrane dominoi momentet kyçe të sfidës dhe arriti të sigurojë trofeun e 13-të radhazi në kampionat, duke vijuar serinë historike të sukseseve në futbollin e femrave.

Takimi u zhbllokua në pjesën e parë nga kapitenia Megi Doçi, e cila realizoi golin e avantazhit pas një loje të balancuar dhe me raste nga të dyja ekipet. Apolonia provoi të reagojë në fraksionin e dytë të lojës, por Vllaznia administroi mirë rezultatin dhe nuk lejoi surpriza.

Goli që vulosi triumfin erdhi në minutën e 81-të, kur Teresa Deda realizoi për 2-0, duke i dhënë fund përfundimisht sfidës dhe duke nisur festën e kuqebluve.

Pas ndeshjes u zhvillua ceremonia e dorëzimit të medaljeve dhe trofeut për ekipin kampion. Medaljet dhe kupa iu dorëzuan futbollisteve të Vllaznisë nga zëvendëspresidenti i FSHF-së, Lutfi Nuri dhe anëtarja e Komitetit Ekzekutiv të FSHF-së, Anila Basha.

Foto: Facebook/ KFF Vllaznia Women

Sezoni i suksesshëm i futbollit të vajzave sjell edhe një arritje historike për klubet shqiptare në arenën europiane. Falë rritjes së koeficientit të Shqipërisë në UEFA, këtë vit vendi ynë do të përfaqësohet me dy skuadra në UEFA Women’s Champions League.

Vllaznia, si kampione e Shqipërisë, do të marrë pjesë në “Champions Path”, ndërsa Apolonia, që u rendit e dyta në kampionat, do të garojë në “League Path”. Të dyja skuadrat do ta nisin aventurën europiane nga raundi i dytë kualifikues.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)