Flamurtari mposht Vllazninë në Vlorë, 3 pikë të arta për mbijetesën

Flamurtari mori një fitore shumë të rëndësishme në shtëpi duke mposhtur Vllazninë me rezultatin 1-0 në Vlorë. Goli i Alesandro Bolzan në pjesën e parë vendosi fatin e takimit dhe i dhuroi skuadrës së Andi Ribajt tre pikë të arta në garën për mbijetesë.

Ndeshja u komplikua për shkodranët në minutën e 37-të, kur Bismark u ndëshkua me karton të kuq nga arbitri Enea Jorgji pas ndërhyrjes ndaj Trashit. Pavarësisht se luajti për më shumë se një orë me 10 lojtarë, Vllaznia tentoi të reagojë, por pa arritur të krijojë raste realisht të rrezikshme për portën e Flamurtarit.

Kjo ishte fitorja e dytë e vlonjatëve ndaj Vllaznisë në Vlorë këtë sezon. Pas këtij rezultati, Vllaznia mbetet në vendin e parë në renditje, me vetëm dy pikë më shumë se Elbasani, ndërsa Flamurtari largohet nga vendi i fundit dhe afrohet me zonën e mbijetesës, duke qenë tre pikë larg Bylisit.

Trajneri i Vllaznisë, Edi Martini, u shpreh i zhgënjyer për mënyrën si erdhi goli. “Na dhemb shumë goli i pësuar. Flamurtari erdhi vetëm një herë në portë në rreth 100 minuta dhe shënoi. Nuk ndërhymë në kohën e duhur. Në pjesën e parë duhej të ishim më agresivë. Patëm raste për të shënuar dhe nëse do ta bënim, ndeshja do të ishte më e qetë. Gjithsesi, në futboll ndodh që të pësosh me një rast dhe një gol”.

Ai theksoi se skuadra duhet të reagojë menjëherë. “Jemi në vend të parë dhe duhet të vazhdojmë të bëjmë lojën tonë. Na pret një ndeshje shumë e vështirë në Rrogozhinë dhe duhet të shohim vetëm përpara”.

Nga ana tjetër, trajneri i përkohshëm i Flamurtarit, Andi Ribaj, e cilësoi këtë sukses shumë të rëndësishëm për moralin e ekipit.

“Ky 3-pikësh na jep shumë besim për vazhdimësinë, sidomos kur vjen kundër ekipit të vendit të parë dhe më të mirë të momentit në Superiore. Djemtë dhanë maksimumin dhe i falënderoj për mënyrën si e menaxhuan ndeshjen”.

Ribaj shtoi se skuadra duhet të vazhdojë të punojë për të përmirësuar disa elemente.
“Presioni i pikëve ndonjëherë të tërheq në mbrojtje, por djemtë ia dolën. Do të punojmë gjatë javës për problematikat dhe për të marrë maksimumin në ndeshjet e mbetura”.