Tërhiqet nga Botërori 2026, Irani refuzon të luajë në SHBA

Tensionet gjeopolitike po ndikojnë edhe në sport. Kombëtarja e Iran ka vendosur të tërhiqet nga Kupa e Botës 2026, që do të zhvillohet verën e ardhshme në Amerikë.

Vendimi u konfirmua nga ministri iranian i Sportit, Ahmad Donjamali, i cili në një intervistë televizive deklaroi se Irani nuk ka ndërmend të marrë pjesë në një turne që zhvillohet në SHBA, në mes të përshkallëzimit të konfliktit në Lindjen e Mesme.

“Duke qenë se kjo qeveri e korruptuar ka vrarë liderin tonë, ne nuk kemi asnjë qëllim të marrim pjesë në Kupën e Botës”, u shpreh Donjamali, duke iu referuar liderit suprem iranian Ali Khamenei.

Ai shtoi se veprimet e SHBA-së ndaj Iranit kanë qenë armiqësore dhe kanë shkaktuar viktima të shumta.

“Janë ndërmarrë masa të liga kundër Iranit. Na janë imponuar dy luftëra brenda tetë apo nëntë muajve dhe mijëra qytetarë tanë janë vrarë. Nuk kemi absolutisht asnjë mundësi të marrim pjesë,” deklaroi ministri.

Vendimi vjen pavarësisht përpjekjeve për të mbajtur sportin larg tensioneve politike. Presidenti i SHBA-së, Donald Trump, kishte shprehur më herët shpresën që kombëtarja iraniane të merrte pjesë normalisht në turne. Edhe presidenti i FIFA, Gianni Infantino, kishte theksuar se Kupa e Botës është një event që duhet të bashkojë njerëzit.

“Gjatë bisedimeve, presidenti Trump ka theksuar se skuadra iraniane është natyrisht e mirëpritur të marrë pjesë në turneun në SHBA,” kishte deklaruar Infantino.

Sipas kalendarit të turneut, Irani ishte shortuar në Grupin G dhe do të zhvillonte ndeshjet e fazës së grupeve pikërisht në SHBA, ku pritej të përballej me Zelandën e Re më 15 qershor, me Belgjikën më 21 qershor dhe me Egjiptin më 26 qershor.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)