Briken Calja kampion absolut i Ballkanit, vendos rekord në shkëputje

Briken Calja konfirmohet si një prej sportistëve më të mëdhenj shqiptarë të dekadave të fundit dhe një kampion absolut i peshëngritjes. Shtangisti nga Elbasani dominoi peshën deri në 79kg në Kampionatin Ballkanik, duke u shpallur kampion absolut.

Federata e Peshëngritjes

Ai fitoi medaljen e artë në shkëputje, ku vendosi edhe rekord të ri Ballkani me 150kg të ngritura në shtangë. Më pas, Calja u pozicionua në krye edhe në shtytje, me 185kg. Medalja e tretë e artë ishte në dygarësh, ku ngriti në total 335kg. Një arritje e jashtëzakonshme për 35-vjeçarin, i cili duket se është rikthyer në formën më të mirë pas dëmtimeve të muajve të fundit, që nuk e kishin lejuar të rivalizonte si duhej në arenën ndërkombëtare.

Federata e Peshëngritjes

Briken Calja është një prej peshëngritësve më të mirë në historinë e Shqipërisë. Në vitin 2018, ai u shpall kampion i trefishtë Europe, teksa në 2019-ën ishte kampion i Europës në shkëputje dhe fitues i dy medaljeve të argjendit. Mes medaljeve dhe titujve të pafund, ylli kuqezi është shpallur në vitin 2021 kampion bote në shkëputje, teksa në atë event fitoi edhe dy medalje argjendi në shtytje dhe dygarësh.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)