Si në lojën 'GTA', tentativa e dështuar për grabitjen e makinave luksoze

Një tentativë grabitjeje ka përfunduar në kaos në New York City, ku disa makina luksoze me vlerë mbi 500 mijë dollarë u shkatërruan pas një operacioni që doli jashtë kontrollit.

Ngjarja ndodhi rreth orës 06:00 të mëngjesit në një parkim në Manhattan. Sipas policisë, autorët synonin të vidhnin automjete luksoze, por tentativa dështoi, duke lënë pas një skene dëmtimesh të shumta.

Mes makinave të përfshira ishte një Range Rover Sport i vitit 2025, i cili mbeti i bllokuar nën portën metalike të parkimit pasi roja e uli atë gjatë incidentit. Ndërkohë, një McLaren Artura i vitit 2023 u gjet i përplasur në trotuar pranë një godine, ndërsa një Mercedes G-Class AMG G63 u braktis në rrugë, fatmirësisht pa dëmtime të mëdha.

Një tjetër automjet, një Volvo XC60 i vitit 2018, pësoi dëmtime të konsiderueshme në derën e shoferit dhe xhamin e përparmë. Pronari i tij u shpreh i tronditur nga ajo që kishte ndodhur, duke deklaruar se kishte gjetur makinën e tij të dëmtuar mes një pranie të madhe policore.

Autoritetet bëjnë me dije se të dyshuarit janë larguar nga vendi i ngjarjes me një BMW gri, ndërsa të gjitha automjetet e synuara janë rikuperuar. Fatmirësisht, nuk raportohet për persona të lënduar.

Policia e Nju Jorkut ka nisur hetimet për këtë rast, që dyshohet të jetë pjesë e një skeme të organizuar për vjedhjen e makinave luksoze. Deri më tani nuk ka persona të arrestuar.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)