Mrekullia për shpërndarësin e picave, 40 mijë dollarë bakshish për një gjest të vogël

Një histori prekëse nga SHBA është bërë virale në rrjetet sociale, duke treguar se si një akt i thjeshtë mirësie mund të ndryshojë jetën.

68-vjeçari Dan Simpson, shpërndarës picash, përfundoi duke marrë mbi 40 mijë dollarë bakshish falë një gjesti që për të ishte krejt i zakonshëm.

Gjatë një porosie, ai kuptoi se mungonte pija e kërkuar nga klienti. Pa hezitim, Simpson ndaloi në një dyqan dhe e bleu vetë pijen, duke mos pranuar asnjë kompensim apo bakshish.

Klienti, Brian Wilson, i prekur nga ky veprim dhe duke pasur vështirësi në shikim bashkë me bashkëshorten, vendosi të hapë një fushatë në GoFundMe për ta ndihmuar. Synimi ishte mbledhja e 45 mijë dollarëve, por reagimi i publikut ishte i menjëhershëm dhe shuma arriti shpejt mbi 40 mijë dollarë, ndërsa videoja u shpërnda gjerësisht në TikTok.

Simpson, i cili pritet të dalë në pension në fund të prillit dhe ka përballuar vështirësi financiare në të kaluarën, u shpreh se gjithmonë është përpjekur të ndihmojë të tjerët. Ai tregoi se ka kaluar sfida personale, por ka arritur të rindërtojë jetën me punë dhe përkushtim.

Edhe pas kësaj mbështetjeje të madhe, ai thotë se do të vazhdojë të punojë dhe shpreson të realizojë një ëndërr të kahershme, të vizitojë pyjet me sekuoja gjigante në Kaliforni.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)