“Detyra e jetës sime”, betohet në Shtëpinë e Bardhë kreu i ri i Rezervës Federale

Kevin Warsh është zyrtarisht presidenti i ri i Rezervës Federale të SHBA, duke pasuar Jerome Powell pas 8 vitesh në detyrë. Ish-financieri dhe figura e njohur në Wall Street bëi betimin në Shtëpinë e Bardhë, në një ceremoni ku ishte i pranishëm edhe presidenti Donald Trump.

Warsh u shfaq për herë të parë në një event publik krah Trumpit që nga momenti kur u zgjodh në janar, pas një procesi përzgjedhjeje që zgjati disa muaj. Emërimi i tij është konsideruar një nga ndryshimet më të rëndësishme në drejtimin e politikës monetare amerikane në vitet e fundit.

Në fjalimin e tij të parë si kreu i Fed, Warsh deklaroi se synon një qasje të orientuar drejt reformave, duke theksuar se institucioni duhet të mësojë nga sukseset dhe gabimet e së kaluarës dhe të shmangë modelet e ngurta të vendimmarrjes. Ai shtoi se Fed duhet të ruajë standarde të larta integriteti dhe performancë, duke theksuar rëndësinë e energjisë dhe vendosmërisë në drejtimin e bankës qendrore.

Sipas tij, ekonomia amerikane ka potencial për një periudhë prosperiteti të paprecedentë, me rritje të të ardhurave reale dhe përmirësim të standardit të jetesës për qytetarët. Ai theksoi se misioni kryesor i Fed mbetet stabiliteti i çmimeve dhe punësimi maksimal, duke shtuar se këto objektiva mund të arrihen vetëm përmes qartësisë dhe pavarësisë institucionale.

Warsh falënderoi Donald Trump për besimin dhe e cilësoi postin e ri si detyrën e jetës së tij, ndërsa shtoi se synon të punojë në disa fronte, përfshirë përmirësimin e politikave monetare dhe forcimin e stabilitetit ekonomik.

Nga ana e tij, Trump deklaroi se pret që Warsh të drejtojë Fed me pavarësi të plotë dhe e vlerësoi si një nga figurat më të afta për këtë detyrë, duke theksuar se SHBA mund të hyjë në një periudhë të re rritjeje ekonomike nën drejtimin e tij.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)