Rutte ia thotë troç BE-së: Mos ëndërroni, pa SHBA nuk mund të mbroheni

Sekretari i Përgjithshëm i NATO-s, Mark Rutte ngriti alarmin për situatën në Ukrainë, duke deklaruar se vendi po hyn në një nga periudhat më të vështira të viteve të fundit, si pasojë e goditjeve të shtuara ruse ndaj rrjeteve energjetike dhe objekteve strategjike që kanë lënë mijëra banorë pa energji dhe ngrohje në këto ditë dimri.

Në fjalimin e tij para eurodeputetëve, Rutte theksoi se sulmet kanë pasur ndikim të drejtpërdrejtë në jetën e përditshme të civilëve dhe në funksionimin e qyteteve kryesore.

Shefi i NATO foli edhe për përpjekjet diplomatike që janë duke u zhvilluar për paqen në Ukrainë, duke vlerësuar rolin e SHBA-ve në nxitjen e dialogut dhe duke përmendur angazhimin e disa vendeve evropiane për të ndërtuar mekanizma të qëndrueshëm sigurie për Kievin. Sipas tij, qëllimi kryesor mbetet ndalimi i luftës përmes një zgjidhjeje afatgjatë, që do të garantonte stabilitet dhe do të shmangte një rikthim të agresionit rus.

Gjithashtu, Rutte i kërkoi Bashkimit Evropian fleksibilitet në përdorimin e fondeve të dedikuara për mbrojtjen, duke paralajmëruar se kufizimet burokratike mund të pengojnë furnizimin e shpejtë të Ukrainës me pajisje jetike. “Vendimet duhet të bazohen në realitetin në terren”, nënvizoi ai.

Duke prekur zhvillimet në Arktik, Rutte tha se NATO duhet të rrisë vëmendjen ndaj rajonit për shkak të interesave në rritje të Rusisë dhe Kinës. Ai theksoi se marrëdhëniet mes SHBA-ve, Danimarkës dhe Groenlandës janë çështje delikate, por lidhen drejtpërdrejt me sigurinë kolektive.

Në fund, Rutte u shpreh se Evropa nuk mund të garantojë mbrojtjen e saj pa mbështetjen amerikane, duke theksuar se partneriteti transatlantik mbetet shtylla kryesore e sigurisë evropiane.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)