Hera e parë në histori, politikanët bëjnë fushatë elektorale në… sauna

Janë një prej vendeve me kulturën më të jashtëzakonshme në botë. Politikanët atje takohen lirshëm me njerëzit, nuk shoqërohen nga truproja dhe nuk udhëtojnë me autokolona policie. Përkundrazi, votuesit në Danimarkë janë mësuar ti shohin politikanët që shpërndajnë biskota apo lule gjatë fushatës elektorale. Por, këtë herë disa kandidatë kanë zgjedhur një mënyrë krejt të pazakontë për të takuar qytetarët: në sauna.

Ngjarja ndodhi në Kopenhagen, ku kandidatët u takuan me votuesit ndërsa qëndronin në sauna të veshur me rroba banje. Kur ka mbetur diçka më tepër se një javë para zgjedhjeve parlamentare të 24 marsit, dy kandidatë nga Partia Socialdemokrate e kryeministres Mette Frederiksen zhvilluan një takim me qytetarët në këtë ambient joformal. Deputetja Ida Auken dhe ministri i Drejtësisë, Peter Hummelgaard diskutuan me rreth 18 votues për tema si klima, energjia, pabarazia dhe kriminaliteti, ndërsa herë pas here hidhnin ujë mbi gurët e nxehtë të saunës.

“Është hera e parë që bëj fushatë në një sauna”, tha Auken. Ajo shtoi se kjo fushatë ka përfshirë edhe forma të tjera të pazakonta takimesh me votuesit, si lojëra hendbolli apo vizita në bare, në vend të paneleve tradicionale politike. Hummelgaard ndërkohë provoi edhe një banjë me akull mes dy sesioneve në sauna. “Fushata duhet të jetë edhe argëtuese. Është një periudhë shumë intensive prej katër javësh dhe mendova se kjo do të ishte një përvojë qetësuese dhe një mënyrë e mirë për të takuar votuesit”, u shpreh ai.

Në Danimarkë, kontakti i drejtpërdrejtë mes qytetarëve dhe politikanëve konsiderohet diçka e zakonshme. Sipas Auken, takime të tilla ndihmojnë që njerëzit t’i shohin politikanët si persona të zakonshëm dhe të rrisin besimin tek ata. Në aktivitet nuk kishte masa të veçanta sigurie dhe pjesëmarrësit nuk ishin verifikuar paraprakisht. Partia Socialdemokrate, e cila është në pushtet që nga viti 2019 dhe që aktualisht drejton një koalicion, kryeson sondazhet me rreth 21,5 për qind të mbështetjes. Megjithatë, kjo shifër është rreth gjashtë pikë më e ulët se rezultati i zgjedhjeve të vitit 2022, ndërsa formimi i qeverisë së re pritet të varet nga negociatat pas zgjedhjeve.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)