“Nga parajsë në qytet fantazmë”, si po i humb Dubai 540 milionë euro në ditë

Qyteti i njohur për luksin dhe turizmin masiv, Dubai, po përjeton një nga periudhat më të vështira në historinë e tij, teksa përplasjet në Lindjen e Mesme kanë goditur drejtpërdrejt ekonominë dhe jetën e përditshme në Emiratet e Bashkuara Arabe.

Sipas Daily Mail-it, pas përshkallëzimit të konfliktit mes Shteteve të Bashkuara, Izraelit dhe Iranit, Dubai është përfshirë nga një valë largimesh masive të turistëve dhe biznesmenëve të huaj. Frika se qyteti mund të jetë objektiv i sulmeve me raketa apo dronë ka shkaktuar paralizë të menjëhershme të aktivitetit ekonomik, duke i kushtuar ekonomisë lokale deri në 540 milionë euro në ditë.

Aeroporti i Dubait, dikur një nga më të ngarkuarit në botë për fluturime ndërkombëtare, sot funksionon me kapacitete minimale. Hotelet luksoze, resortet dhe restorantet janë pothuajse bosh, ndërsa shumë prej tyre kanë mbyllur dyert. Vetëm gjatë javës së fundit, shtatë hotele me pesë yje kanë pezulluar aktivitetin, duke lënë pa punë qindra punonjës ose duke i dërguar në leje pa pagesë.

Megjithatë, autoritetet lokale dhe kompanitë e mëdha shmangin ta lidhin hapur krizën me luftën, duke përdorur justifikime si “rinovime” apo “përmirësime”. Ndërkohë, realiteti në terren është krejt ndryshe, zonat turistike dhe qendrat historike janë bosh, ndërsa të ardhurat e vetme për bizneset e hapura vijnë nga banorët lokalë që përfitojnë nga rënia drastike e çmimeve.

Situata është edhe më dramatike për punëtorët emigrantë, të cilët përbëjnë deri në 90% të popullsisë së Dubait. Ndryshe nga turistët dhe të pasurit që u larguan menjëherë, mijëra punëtorë nga Azia kanë mbetur pa të ardhura dhe pa mundësi për t’u kthyer në vendet e tyre. Shumë prej tyre jetojnë në kushte të vështira, ndërsa humbja e punës ka shkaktuar pasoja zinxhir në familjet e tyre.

Paralelisht me krizën ekonomike dhe sociale, autoritetet kanë vendosur masa të rrepta censurimi, duke ndaluar publikimin e pamjeve apo informacioneve mbi dëmet e shkaktuara nga sulmet. Shkelja e këtyre rregullave mund të dënohet me burg dhe gjoba të larta, ndërsa frika nga survejimi ka ndikuar edhe në komunikimin e përditshëm të banorëve.

Në këto kushte, perspektiva për rimëkëmbjen e Dubait mbetet e pasigurt, ndërsa shpresa e vetme lidhet me një ulje të tensioneve dhe arritjen e një marrëveshjeje paqeje afatgjatë në rajon.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)