Ish-ushtari i forcave speciale afgane vritet pas një sherri në një lokal në Angli

Një ngjarje tragjike ka tronditur Mbretërinë e Bashkuar, ku një ish-ushtarak afgan, i cili kishte bashkëpunuar me trupat britanike, ka humbur jetën pas një sherri të dhunshëm në një lokal.

Viktima është identifikuar si Abdul Wali Mamozai, 33 vjeç, ish-oficer i forcave speciale afgane, i cili kishte mbërritur në Britani rreth shtatë muaj më parë përmes programit të zhvendosjes për bashkëpunëtorët afganë. Ai priste të bëhej baba, pasi bashkëshortja e tij, Habiba Haidari, është shtatzënë.

Sipas Thames Valley Police, oficerët u njoftuan për një person të pajetë në zonën Market Street në Bracknell. Pas hetimeve të para, katër persona, të moshave 27 deri në 35 vjeç, u arrestuan nën dyshimin për vrasje dhe dhunë, por më pas u lanë të lirë me kusht.

Mamozai kishte jetuar fillimisht në një hotel në Crawley, përpara se të transferohej në Bracknell, ku punonte në një lavazh makinash. Bashkëshortja e tij rrëfen se çifti kishte kaluar një ditë të qetë së bashku, përpara se ai të dilte në mbrëmje me një mik.

Ajo deklaroi se u zgjua në orët e para të mëngjesit dhe, duke mos e gjetur bashkëshortin, tentoi ta telefononte dhjetëra herë pa sukses. Më pas njoftoi stafin e sigurisë për zhdukjen e tij.

Në një reagim emocional, ajo tha se nuk mund të vazhdojë të jetojë në të njëjtin vend, pasi kujtimet e bashkëshortit e rëndojnë psikologjikisht.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)