“Po rrezikon katolikët”: Trump sulmon sërish Papën, vjen përgjigja e Vatikanit

Presidenti i SHBA-së, Donald Trump ka rikthyer kritikat ndaj Papa Leonit XIV gjatë një interviste për “Salem News”. Deklaratat e tij erdhën vetëm dy ditë përpara vizitës së Sekretarit Amerikan të Shtetit, Marco Rubio në Vatikan, që synon përmirësimin e marrëdhënieve. “Papa po vë në rrezik shumë katolikë dhe shumë njerëz”, deklaroi Trump, duke shtuar se Ati i Shenjtë “preferon të flasë për pranueshmërinë që Irani të zotërojë armë bërthamore”, një qëndrim që sipas tij “nuk është pozitiv”.

Ndërkohë, kardinali Gerhard Ludwig Müller ka theksuar se Rubio është aktualisht “bashkëbiseduesi më i besueshëm për Selinë e Shenjtë”, duke nënvizuar nevojën për marrëveshje mes SHBA-së dhe Vatikanit. Ai shtoi se mbi 50 milionë katolikë në SHBA nuk i mirëpresin sulmet ndaj Papës dhe u bëri thirrje politikanëve për më shumë diplomaci.

Nga ana tjetër, Sekretari i Shtetit të Vatikanit, Pietro Parolin reagoi duke theksuar se Papa tashmë e ka dhënë përgjigjen e tij. “Ai po bën atë që kërkon roli i tij: të predikojë paqen”, deklaroi Parolin. Zyrtari i Selisë së Shenjtë nënvizoi se pavarësisht kritikave, Papa do të vazhdojë misionin e tij për të shpallur Ungjillin dhe paqen.

Ndërkohë, është konfirmuar takimi mes Papës Leoni XIV dhe Marco Rubio, i cili do të zhvillohet më 7 maj në Pallatin Apostolik në Vatikan. Sipas burimeve nga Selia e Shenjtë, axhenda e Papës mbetet e pandryshuar, pavarësisht deklaratave të fundit të Trump.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)