“Do jem në Shtëpinë e Bardhë dhe 8-9 vjet”, Trump shokon audiencën

Presidenti i Shteteve të Bashkuara, Donald Trump ka ngjallur reagime pas një deklarate të bërë gjatë një samiti biznesi në Shtëpinë e Bardhë, ku me tone humori ai tha se mund të qëndrojë në pushtet edhe për 8 apo 9 vite të tjera.

Gjatë fjalimit, Trump u shpreh se planifikon të përfitojë personalisht nga lehtësitë fiskale të miratuara nga administrata e tij pasi të largohet nga detyra.

“Kur të largohem nga posti pas, të themi, tetë apo nëntë vitesh, do të jem në gjendje t’i përdor vetë,” tha ai, duke shkaktuar reagime dhe të qeshura në sallë.

Presidenti amerikan bëri edhe komente me nota ironike për moshën e tij, duke theksuar se nuk e konsideron veten të moshuar,  duke u krahasuar me paraardhësin e tij, Joe Biden.

“Nuk jam aspak i moshuar. Ndihem njësoj si 50 vite më parë,” u shpreh Trump.

Ai shtoi gjithashtu se kandidatët për president dhe nënpresident duhet t’i nënshtrohen testeve kognitivi, duke theksuar se ai vetë ka kryer 3 të tilla dhe ka rezultuar me sukses në secilin prej tyre.

Deklaratat e fundit rikthejnë në vëmendje spekulimet për një mandat të tretë presidencial. Donald Trump e ka prekur disa herë këtë temë, si në takime me republikanët në Kongres, ashtu edhe në intervista, ku nuk e ka përjashtuar plotësisht këtë mundësi.

Megjithatë, një skenar i tillë mbetet i pamundur në praktikë. Amendamenti i 22-të i Kushtetutës së SHBA përcakton qartë se një president mund të zgjidhet vetëm për dy mandate, pavarësisht nëse ato janë të njëpasnjëshme apo jo.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)