Vrau babanë pasi i kishte vrarë nënën, arrestohet për të kryer dënimin 43 vjeçari në Sarandë

Policia e Sarandës ka ekzekutuar vendimin e gjykatës duke arrestuar 43-vjeçarin Klementin Islamaj, i dënuar për një ngjarje të rëndë kriminale.

Sipas njoftimit zyrtar, arrestimi i Klementin Islamaj u bë pasi Gjykata e Shkallës së Parë e Juridiksionit të Përgjithshëm Sarandë e ka dënuar atë me 3 vite e 4 muaj burg për veprën penale “vrasje e kryer në gjendje të tronditjes së fortë psikike”.

Ngjarja për të cilën ai është dënuar ka ndodhur më 10 gusht 2024 në fshatin Shalës të bashkisë Konispol, në familjen Islamaj. Sipas dosjes hetimore, babai i tij, Hysen Islamaj, dyshohet se kishte vrarë më parë bashkëshorten e tij, Shano Islamaj, dhe më pas kishte kanosur djalin.

Në dëshminë e dhënë gjatë hetimeve, Klementin Islamaj ka treguar se është përballur me skena të rënda në banesë dhe se, pas konfliktit me të atin, ka reaguar në gjendje të fortë tronditjeje.

Sipas tij, pas ngjarjes ai ka kërkuar ndihmë për nënën dhe ka njoftuar emergjencën, ndërsa më vonë është hetuar për rolin e tij në konfliktin familjar që përfundoi me viktima.

Policia e Sarandës bëri të ditur se pas arrestimit, 43-vjeçari u shoqërua në ambientet e komisariatit dhe më pas dosja i është referuar Prokurorisë për ekzekutimin e mëtejshëm të dënimit.

Autoritetet theksojnë se Klementin Islamaj do të vuajë pjesën e mbetur të dënimit të dhënë nga gjykata.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)