UNESCO: Studentët shqiptarë kryesojnë rajonin për studime jashtë vendit

Studentët shqiptarë po zgjedhin gjithnjë e më shumë universitetet jashtë vendit, duke e renditur Shqipërinë të Ballkanit Perëndimor për ritmin e rritjes së këtij fenomeni. Ky është përfundimi i një raporti të publikuar nga UNESCO mbi zhvillimet në arsim.

Sipas analizës, numri i të rinjve shqiptarë që ndjekin studimet jashtë është rritur ndjeshëm vitet e fundit, me një ritëm më të lartë se vendet e tjera të rajonit. Ky trend lidhet ngushtë me ndryshimet demografike dhe migratore në vend, ku rënia e numrit të maturantëve si pasojë e emigracionit dhe tkurrjes së popullsisë, po shoqërohet me rritjen e atyre që largohen për arsim.

Raporti evidenton se arsimi i lartë është kthyer në një nga faktorët kryesorë që i shtyn të rinjtë të vijojnë shkollimin dhe të kërkojnë mundësi jashtë vendit. Perspektiva për studime universitare, brenda apo jashtë Shqipërisë, ka rritur kërkesën për arsim të mesëm dhe të lartë.

Një tjetër element i theksuar është ndryshimi i profilit të emigracionit shqiptar ndër vite. Në vitet ’90, largimi dominohej nga punëtorë të pakualifikuar për arsye ekonomike, ndërsa sot një pjesë gjithnjë e më e madhe e të rinjve emigron për arsim dhe zhvillim profesional, duke e shndërruar shkollimin në një kanal të rëndësishëm emigrimi.

Sipas raportit, rreth 50% e popullsisë shqiptare ka përjetuar emigracion që nga viti 1991, ndërsa një pjesë e konsiderueshme e tyre kanë nivele të larta arsimimi.

Ndërkohë, sistemi i arsimit të lartë në vend ka pësuar ndryshime të rëndësishme pas përfshirjes në Procesin e Bolonjës në vitin 2003. Kjo reformë ka sjellë rritje të regjistrimeve dhe mobilitetit studentor. Në periudhën 2003–2013, numri i studentëve është rritur mesatarisht me 13% në vit, ndërsa norma bruto e regjistrimit është rritur nga 16% në 64%, duke arritur në rreth 82% në vitin 2024.

Raporti nënvizon gjithashtu se sistemi parauniversitar është bërë më lehtësues për vijimin e studimeve, me nivele të larta kalueshmërie në provimet përfundimtare, çka ka kontribuar në rritjen e pjesëmarrjes në arsimin e lartë.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)