Dënohet me 18 vjet burg për përdhunim studiuesi i famshëm i Islamit

Tariq Ramadan, një akademik i njohur dhe studiues i Islamit, është dënuar me 18 vite burg nga një gjykatë në Paris për vepra të rënda penale që lidhen me dhunën seksuale.

Ramadan, 63 vjeç, ka qenë një figurë e rëndësishme në debatet mbi Islamin dhe integrimin në Evropë, duke ligjëruar në universitete dhe forume ndërkombëtare.

Ai u shpall fajtor për përdhunimin e tre grave në Francë, ngjarje që sipas hetimeve kanë ndodhur mes viteve 2009 dhe 2016. Gjykata e konsideroi një nga rastet si përdhunim ndaj një personi vulnerabël, duke e rënduar më tej akuzën.

Sipas dëshmive, viktimat kanë raportuar dhunë fizike dhe presion psikologjik gjatë takimeve me të.

Procesi gjyqësor nisi në mars dhe u zhvillua në mungesë të Ramadan, i cili sipas avokatëve ndodhej i shtruar në një spital në Gjenevë për shkak të problemeve shëndetësore nga skleroza multiple.

Pavarësisht mungesës së tij, gjykata vijoi me shqyrtimin e provave dhe dëshmive, duke dhënë vendimin përfundimtar.

Përveç dënimit me burg, gjykata vendosi që ai të jetë nën mbikëqyrje për tetë vite pas lirimit dhe i ndaloi kontaktet me viktimat si dhe çdo publikim që lidhet me çështjen.

Autoritetet franceze kanë lëshuar gjithashtu një urdhër arresti ndërkombëtar ndaj tij.

Ramadan ka mohuar vazhdimisht akuzat. Ndërkohë, në Zvicër ai është dënuar më parë për një rast tjetër të ngjashëm të dhunës seksuale në vitin 2008.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)